3 кастрычніка ў бібліятэцы адкрыецца мастацкая выстаўка Леаніда Марчанкі “Паэзія графікі”.
Празрыстасць нябёс і нізкія шэрыя хмары, квітнеючы бэз і палымяныя верхавіны асенніх дрэў, бярозавы гай і нарачанскія азёры… Мастацтва Леаніда Марчанкі адлюстроўвае першародную прыгажосць зямлі, дачыненне чалавека да яе, кліч гістарычнай памяці, пошукі ўнутранай гармоніі.
Талент майстра праявіўся ў розных відах выяўленчага мастацтва, аднак найбольш поўна і ярка – у афорце, акварэлі і алоўкавым малюнку. Тонкі жывапісец-акварэліст, ён стварыў незвычайна празрыстыя і складаныя колеры з лёгкім балансаваннем паўтонаў – захад, сіні вечар, саламяныя стагі, белая царква, люстэрка вады. Гармонія прыроды і чалавека, іх яднанне відавочна ў творах мастака.
Дзівоснай бачыцца і графіка Леаніда Марчанкі: складаная, але разам з тым, тонкая і паэтычная. І, канечне, афорт − любімая тэхніка майстра − вытанчаная, серабрыстая, светланосная. Ён стварыў некалькі серый бліскучых афортаў, прысвечаных прыродзе Беларусі, напоўненых пяшчотай і трапяткім пачуццём да роднай зямлі. На выстаўцы прадстаўлены творы з серый “Край нарачанскі”, “Мой край азёрны”, “Зямля і людзі” і інш.
Леанід Марчанка (1941–1996) – беларускі мастак-графік, нарадзіўся ў г. Бабруйску Магілёўскай вобласці. Прафесійную адукацыю атрымаў у Пензенскім мастацкім вучылішчы імя К.А. Савіцкага ў Расіі і Беларускім дзяржаўным тэатральна-мастацкім інстытуце. З 1974 г. − член Саюза мастакоў СССР.
Пачнецца вернісаж а 16-й гадзіне ў галерэі “Лабірынт” (3-ці паверх).
Жывапісную паэзію Леаніда Марчанкі можна ўбачыць у галерэі “Лабірынт” да 27 лістапада 2017 г.
Дата заканчэння работы выстаўкі можа быць зменена.
Тэлефон для даведак: (8 017) 266 37 37.