27 мая на базе бібліятэкі Беларускай дзяржаўнай сельскагаспадарчай акадэміі ў г. Горкі адбыўся рэспубліканскі навукова-адукацыйны семінар “Рэдкія і каштоўныя фонды – аснова захавання гістарычнай памяці”.
У рамках семінара абмяркоўваліся пытанні, якія датычацца выпрацоўкі і рэалізацыі адзінай палітыкі адносна кніжных помнікаў, ажыццяўлення іх уліку, захаванасці і рацыянальнага выкарыстання, кадравага забеспячэння дзейнасці па рабоце з кніжнымі помнікамі ў бібліятэках устаноў вышэйшай адукацыі Рэспублікі Беларусь.
У семінары прынялі ўдзел кіраўнікі і спецыялісты бібліятэк устаноў вышэйшай адукацыі Рэспублікі Беларусь, абласных бібліятэк, спецыялісты Нацыянальнай бібліятэкі Беларусі і Беларускай сельскагаспадарчай бібліятэкі імя І.С. Лупіновіча.
З дакладамі ў анлайн-рэжыме выступілі Ірына Цікунова, начальнік Упраўлення сістэмай фондаў Расійскай дзяржаўнай бібліятэкі (Расія, Масква), Пётр Лапа, генеральны мэнэджар бібліятэкі Назарбаеў універсітэта (Казахстан, Астана), і Ірына Стралкова, дацэнт кафедры інфармацыйных тэхналогій Рэспубліканскага інстытута інавацыйных тэхналогій Беларускага нацыянальнага тэхнічнага ўніверсітэта (Беларусь, Мінск).
У семінары прыняла ўдзел загадчыца навукова-даследчага аддзела кнігазнаўства Нацыянальнай бібліятэкі Беларусі Галіна Кірэева з дакладам “Да стварэння Дзяржаўнага рэестра кніжных помнікаў Рэспублікі Беларусь”.
