28 кастрычніка ў бібліятэцы прайшлі заняткі “Рэстаўрацыйная майстэрня” ў рамках “Клуба кніжных прафесараў”.
Дзеці мелі рэдкую і ўнікальную магчымасць “пранікнуць” у сапраўдны аддзел рэстаўрацыі і кансервацыі бібліятэчных дакументаў Нацыянальнай бібліятэкі Беларусі. Экскурсію для юных прафесараў праводзіла загадчыца аддзела Муратава Дзіяна Анатольеўна.
Пашкоджаная кніга з паліцы кнігасховішча трапляе ў рэстаўрацыйную майстэрню. Задача рэстаўрацыі – ліквідаваць пашкоджанні, забяспечыць магчымасць выкарыстання яе чытачом доўгі час, захаваўшы яе інфармацыйную, гістарычную і мастацкую каштоўнасць. Рэстаўратар імкнецца падоўжыць кнізе жыццё ў будучыні, захаваўшы ў ёй мінулае. Кожнае выданне або рукапіс мае свой лёс, таму неабходна захаваць гісторыю з усімі назапашанымі дотыкамі, вобраз і энергетыку кнігі. Рэстаўрацыя кніг – працэс далікатны, які патрабуе высокага майстэрства рэстаўратараў, ведаў тэхналогіі, уласцівасцей матэрыялаў, а таксама творчага падыходу.
Удзельнікі заняткаў убачылі цікавае памяшканне, напоўненае спецыяльным абсталяваннем і матэрыяламі для “лячэння” кніг, даведаліся якія “хваробы” бываюць у кніг і як правільна імі карыстацца.
Матэрыял пададзены навукова-даследчым аддзелам кнігазнаўства.
