16 чэрвеня ў Расійскай нацыянальнай бібліятэцы адбылася штотогадовая 29-я канферэнцыя “Санкт-Пецярбург і беларуская культура”.
Сёлета мерапарыемства прысвечана 500-годдзю “Малой падарожнай кніжкі” Францыска Скарыны. Гэту кнігу лічаць першай з надрукаваных на беларускіх землях. Выданне, якое складаецца з 22 асобных твораў і адрозніваецца параўнальна невялікім фарматам, прызначалася ў свой час не толькі для царкоўных богаслужэнняў, але і для прыватнага чытання, падарожжаў, навучання грамаце.
У цэнтры ўвагі канферэнцыі былі помнікі гісторыі і кніжнай культуры, музычная і мастацкая творчасць, біяграфіі грамадскіх дзеячаў. Даследчыкі з Расіі і Беларусі паведамілі пра гістарычныя дакументы, што захоўваюцца ў мінскіх і пецярбургскіх архівах і бібліятэках, абмеркавалі пытанні супрацоўніцтва ў сферы культуры.
А.Л. Бараноўскі
Нацыянальную бібліятэку Беларусі прадставіў галоўны бібліёграф навукова-даследчага аддзела бібліяграфіі Андрэй Бараноўскі, які выступіў з дакладам “Ураджэнцы Санкт-Пецярбурга ў праекце Нацыянальнай бібліятэкі Беларусі «Беларуская бібліяграфія ў асобах»”.
Матэрыял пададзены навукова-даследчым аддзелам бібліяграфіі.
