25 лістапада ў Нацыянальнай бібліятэцы ў рамках VIII Беларускіх Калядных чытанняў адбылося пасяджэнне секцыі “Духоўная асвета праз дзейнасць бібліятэк”.
Усяго ў мерапрыемстве ўзяло ўдзел больш за 60 чалавек з усіх рэгіёнаў Беларусі. Мерапрыемства прайшло пад кіраўніцтвам протаіерэя Уладзіміра Барысевіча, старшыні Каардынацыйнага савета па бібліятэчнай дзейнасці пры Сінадальным аддзеле рэлігійнай адукацыі і катэхізацыі Беларускай праваслаўнай царквы, загадчыка сектара прыходскіх бібліятэк аддзела рэлігійнай адукацыі і катэхізацыі Гродзенскай епархіі; Вольгі Рынкевіч, намесніка старшыні Каардынацыйнага савета па бібліятэчнай дзейнасці пры Сінадальным аддзеле рэлігійнай адукацыі і катэхізацыі БПЦ; Кацярыны Седневай, вядучага бібліятэкара навукова-даследчага аддзела бібліятэказнаўства Нацыянальнай бібліятэкі Беларусі.
Протаіерэй Уладзімір Барысевіч у сваім прывітальным слове адзначыў, што “…упершыню за многія гады праваслаўная царква адступіла ад сваёй традыцыі прысвячаць Калядныя чытанні тэме, прымеркаванай да юбілейнай даты і гістарычных падзей мінулага, а надае ўвагу сучасным глабальным праблемам. У цэнтры ўвагі цяперашніх Калядных чытанняў – праблемы духоўна-маральнага выбару чалавека і ўсяго чалавецтва ва ўмовах усёпранікальнай глабалізацыі. Дадзены семінар стане добрай пляцоўкай для разгляду актуальных пытанняў плённага супрацоўніцтва царквы і бібліятэчнай сістэмы, маральнай сферы і гісторыка-культурнай спадчыны Беларусі”.
На пасяджэнні секцыі прагучалі даклады, прысвечаныя вынікам дзейнасці ўдзельнікаў па грамадзянска-патрыятычным і духоўна-маральным выхаванні дзяцей і моладзі, прадстаўлены праекты па рэалізацыі асветніцкай дзейнасці, акрэслены новыя вектары супрацоўніцтва служыцеляў царквы і публічных бібліятэк, бібліятэк устаноў адукацыі і бібліятэк Беларускага экзархата.
Тэксты дакладаў будуць апублікаваны на сайце “Праваслаўныя бібліятэкі Беларусі” і сайце Сінадальнага аддзела рэлігійнай адукацыі і катэхізацыі Беларускай праваслаўнай царквы.
Матэрыял пададзены навукова-даследчым аддзелам бібліятэказнаўства.
