26 верасня ў Бруселі (Бельгія) прайшоў семінар экспертаў па палітыцы культуры “Кантакты між людзьмі”, арганізаваны генеральным дырэктаратам Еўрапейскай камісіі па адукацыі і культуры.
Мерапрыемства адбылося ў рамках чацвёртай платформы праграмы Усходняга партнёрства.
У семінары ўзялі ўдзел спецыялісты ў галіне культуры, а таксама прадстаўнікі недзяржаўных грамадскіх арганізацый краін Усходняга партнёрства – Арменіі, Азербайджана, Беларусі, Грузіі, Малдовы, Украіны. У рабоце семінара ўдзельнічала загадчыца аддзела абслугоўвання афіцыйнымі дакументамі Нацыянальнай бібліятэкі Беларусі М.В. Знак.
Семінар даў яго ўдзельнікам магчымасць абмяняцца вопытам па больш актыўным павышэнні ролі культуры ў сацыяльна-эканамічным развіцці і палітычных пераўтварэннях у краінах рэгіёна. Вынікамі сустрэчы стала ўзгадненне асноўных элементаў супрацоўніцтва ў галіне культуры ў наступным годзе, а таксама запуск работы па падрыхтоўцы сустрэчы ў галіне культуры на вышэйшым узроўні, запланаванай Еўрапейскай камісіяй на першую палову 2013 г.
