12 ліпеня ў Нацыянальнай бібліятэцы Беларусі ў рамках семінара кіраўнікоў дыпламатычных прадстаўніцтваў і консульскіх устаноў Рэспублікі Беларусь “Асноўныя напрамкі дзейнасці беларускіх замежных устаноў у сучасных умовах” адбыўся круглы стол “500-годдзе беларускага кнігадрукавання”.
У рамках семінара ў канферэнц-зале Нацыянальнай бібліятэкі прайшлі лекцыі “Тэхнікі эфектыўнай камунікацыі ў дзелавых зносінах” і “Гісторыя беларускай дзяржаўнасці, дасягненні сучаснай гістарычнай навукі”.
Падчас пасяджэння круглага стала дырэктар Нацыянальнай бібліятэкі Беларусі Раман Матульскі прэзентаваў міжнародны навуковы праект па факсімільным перавыданні кніжнай спадчыны Францыска Скарыны, рэалізаваны сумесна з банкам БелВЭБ. Кажучы пра маштабы праекта, Раман Матульскі назваў краіны, дзе ўжо адбыліся мерапрыемствы, прысвечаныя 500-годдзю беларускага кнігадрукавання, і падзякаваў кіраўнікам дыпламатычных місій за дапамогу ў іх арганізацыі. Таксама ўдзельнікі семінара атрымалі запрашэнні на Міжнародны кангрэс “500 гадоў беларускага кнігадрукавання” і выстаўку “Францыск Скарына і яго эпоха”.
На заканчэнне сустрэчы для гасцей прайшла аглядная экскурсія па будынку бібліятэкі, падчас якой яны пазнаёміліся з гісторыяй, архітэктурай, інфармацыйнымі рэсурсамі ўстановы. Наведаўшы выстаўку “Пяць стагоддзяў беларускага кнігадрукавання” ўдзельнікі семінара дакрануліся да гісторыі кніжнай культуры Беларусі, а ў музеі кнігі на свае вочы ўбачылі каштоўныя старадрукі Францыска Скарыны.
 |
 |
 |
