Па ініцыятыве Савета бібліятэк Беларусі па інфармацыйным узаемадзеянні 24 мая адбыўся семінар-нарада “Рэсурсы адкрытага доступу ў кантэксце новай рэдакцыі Закона «Аб аўтарскім праве і сумежных правах»”.
У рабоце семінара, які прайшоў у Нацыянальнай бібліятэцы Беларусі (НББ), узялі ўдзел прадстаўнікі бібліятэк ВНУ Беларусі. Падчас нарады былі разгледжаны асноўныя навацыі, прапанаваныя бібліятэчнай грамадскасцю, якія знайшлі адлюстраванне ў новай рэдакцыі Закона “Аб аўтарскім праве і сумежных правах”.
Адзначана, што ў рамках прынятых змен у новай рэдакцыі закона з’явіліся якасна новыя магчымасці фарміравання карпаратыўных электронных інфармацыйных рэсурсаў. Да ўвагі ўдзельнікаў нарады быў прадстаўлены распрацаваны НББ праект аўтарскага дагавору аб перадачы невыключных праў на выкарыстанне твораў на неаплатнай аснове.
Былі прапанаваны розныя алгарытмы ўзаемадзеяння па аптымізацыі электроннага рэсурсу нацыянальных дысертацый, які ствараецца зараз, рэалізацыі яго на карпаратыўнай аснове. Звернута ўвага на тое, што асновай узаемадзеяння пры стварэнні рэсурсу павінна стаць дагаворная дзейнасць з аўтарамі.
Нацыянальны каардынатар ад Рэспублікі Беларусь у міжнародным кансорцыуме EIFL В.І. Брычкоўскі выступіў з паведамленнем на тэму “Фарміраванне рэсурсаў адкрытага доступу ў Рэспубліцы Беларусь”.
Было адзначана, што карпаратыўны рэсурс дысертацый з’яўляецца адным з важных кампанентаў у навукова-адукацыйных рэсурсах адкрытага доступу Рэспублікі Беларусь.
У рамках нарады адбыўся абмен думкамі пра пошук канструктыўных рашэнняў з мэтай наладжвання карпаратыўнага ўзаемадзеяння з бібліятэкамі ВНУ краіны.
