19–20 красавіка спецыялісты бібліятэкі прынялі ўдзел у міжнародным навуковым семінары “Сучасныя праблемы кніжнай культуры: асноўныя тэндэнцыі і перспектывы развіцця”.
Арганізатарамі мерапрыемства, якое прайшло ў Нацыянальным гісторыка-культурным музеі-запаведніку “Нясвіж” і Цэнтральнай навуковай бібліятэцы імя Якуба Коласа НАН Беларусі, з’яўляліся Нацыянальная акадэмія навук Беларусі, Цэнтральная навуковая бібліятэка імя Якуба Коласа, Міністэрства культуры Рэспублікі Беларусь, дзяржаўная ўстанова “Нацыянальны гісторыка-культурны музей-запаведнік «Нясвіж»”, Савет па кнігавыданні Міжнароднай асацыяцыі акадэмій навук, Навуковы савет Расійскай акадэміі навук “Гісторыя сусветнай культуры”, Цэнтр даследаванняў кніжнай культуры ФДБУ навукі “Научный и издательский центр «Наука»” РАН.
Прывітанні ў адрас удзельнікаў накіраваў член-карэспандэнт РАН, саветнік прэзідэнта РАН, дырэктар Навуковага і выдавецкага цэнтра “Наука”, кіраўнік Цэнтра даследаванняў кніжнай культуры, доктар філалагічных навук, доктар гістарычных навук, прафесар У.І. Васільеў. З прывітальнымі словамі выступілі дырэктар Цэнтральнай навуковай бібліятэкі імя Якуба Коласа, кандыдат гістарычных навук, дацэнт А.І. Груша і дырэктар Нацыянальнага гісторыка-культурнага музея-запаведніка “Нясвіж”, кандыдат гістарычных навук С.М. Клімаў.
У рабоце семінара ўдзельнічалі вучоныя і спецыялісты з Беларусі, Ізраіля, Літвы, Польшчы, Расіі, Узбекістана і Украіны.
У рамках семінара прайшлі пасяджэнне круглага стала па агульных праблемах кніжнай культуры і рабочая нарада па міжнародным навуковым супрацоўніцтве.
Ад Нацыянальнай бібліятэкі Беларусі ў семінары прынялі ўдзел загадчык навукова-даследчага аддзела кнігазнаўства Г.У. Кірэева (даклад “«У знак павагі ад аўтара»: дароўныя надпісы вядомых вучоных-гісторыкаў”) і загадчык сектара навукова-праектнай работы Т.А. Сапега (даклад “Шляхі папаўнення калекцыі «Radziviliana» Нацыянальнай бібліятэкі Беларусі”).
