20 снежня ў дзіцячым пакоі Нацыянальнай бібліятэкі Беларусі прайшлі творчыя заняткі “Снежная казка” з цыкла “Нетрадыцыйныя спосабы выяўлення”.
На занятках хлопчыкі і дзяўчынкі навучыліся рабіць кампазіцыі ў тэхніцы выцінанкі. У выніку ў маленькіх удзельнікаў з’явіліся чарадзейныя зімнія ўскрайкі лесу з пушыстымі елачкамі і снежнымі казачнымі хаткамі. Каля хатак размясціліся снегавічкі, а з лесу да іх прыбеглі іх сябры – зайчыкі і лісічкі. І ўвесь гэты зімовы пейзаж дапоўніў снегапад з карункавых сняжынак.
Юныя майстры ішлі дамоў у цудоўным настроі і з гатовымі аздабленнямі для свайго дома да самага любімага свята дзятвы – Новага года.