12 чэрвеня 2010 года на спартыўна-аздараўленчай базе “Алімпіец” адбылася IV летняя Рэспубліканская галіновая спартакіяда работнікаў культуры і мастацтва.
Спартакіяда праводзілася ў мэтах шырокай прапаганды і далейшага развіцця фізічнай культуры і спорту, арганізацыі актыўнага адпачынку працоўных, далучэння іх да масавых фізкультурна-аздараўленчых і спартыўных мерапрыемстваў, устанаўлення сяброўскіх сувязей паміж калектывамі прадпрыемстваў і арганізацый сферы культуры.
У спартакіядзе ўзялі ўдзел каманды горада Мінска, абласцей Беларусі, рэспубліканскіх падведамасных арганізацый Міністэрства культуры. Зборная каманда Нацыянальнай бібліятэкі Беларусі прайшла адборачныя спаборніцтвы ў паўфінале сярод 14 рэспубліканскіх падведамасных арганізацый Міністэрства культуры. Па выніках спаборніцтваў наша каманда заваявала: 1-е месца па гіравым спорце; 2-е – па дартсы; 4-е – па настольным тэнісе; 5-е – па міні-футболе.
У фінале Нацыянальная бібліятэка спаборнічала з 15 зборнымі камандамі Мінскага гарадскога і абласных упраўленняў культуры.
У асабістых першынствах на рахунку бібліятэкі 3-е месца па лёгкай атлетыцы, 4-е – па гіравым спорце, 4-е і 6-е – па дартсы.
Зборная каманда бібліятэкі заняла 10-е агульнакаманднае месца. У камандным заліку былі заваяваны 4-е месца па гіравым спорце і па дартсы; 10-е – па настольным тэнісе; 11-е – па футболе і 13-е – па валейболе.
Разам з нашымі спартсменамі на свята прыбыла і каманда балельшчыкаў. Дзякуем ім за падтрымку!
Віншуем каманду Нацыянальнай бібліятэкі Беларусі і жадаем ёй далейшых спартыўных перамог!