26 чэрвеня ў музеі «Лошыцкая сядзіба» прайшла прэзентацыя Статута Арганізацыі Аб'яднаных Нацый на беларускай мове, прымеркаваная да 75-годдзя ААН.
26 чэрвеня 1945 года ў горадзе Сан-Францыска два беларусы – Кузьма Кісялёў і Андрэй Грамыка – падпісалі Статут ААН. Беларусь стала адной з краін – заснавальніц Арганізацыі Аб'яднаных Нацый.
Прэзентацыя Статута на беларускай мове – адно з юбілейных мерапрыемстваў, запланаваных Міністэрствам замежных спраў і Арганізацыяй Аб'яднаных Нацый у Беларусі.
Сярод запрошаных гасцей быў генеральны дырэктар Нацыянальнай бібліятэкі Беларусі Раман Матульскі. З 1957 года галоўнае кнігасховішча краіны ўваходзіць у сістэму бібліятэк-дэпазітарыяў для сусветнага размеркавання дакументаў і публікацый ААН. У нашым фондзе прадстаўлены выданні шасці кіруючых органаў Арганізацыі Аб'яднаных Нацый.
Бібліятэкі-дэпазітарыі. Нацыянальная бібліятэка Беларусі – дэпазітарый ААН
Статут ААН, ілюстраваны ўнікальнымі гістарычнымі фота з архіва арганізацыі, папоўніў фонд Нацыянальнай бібліятэкі Беларусі.
Прэзентацыя прайшла ў сімвалічным месцы як для ААН, так і для рэспублікі. Тут у 1946–1947 гг. знаходзілася ўпраўленне Адміністрацыі дапамогі і аднаўлення аб'яднаных Нацый (ЮНРРА), якое аказвала гуманітарную дапамогу на тэрыторыях, вызваленых ад фашызму.
Падчас прэзентацыі гасцям прадэманстравалі фільм пра гісторыю ААН ад падпісання статута арганізацыі да цяперашняга часу.
Матэрыял пададзены аддзелам сувязей з грамадскасцю.
Чытайце таксама: Віртуальны цэнтр па дзейнасці міжнародных арганізацый