16 снежня ў Нацыянальнай бібліятэцы Беларусі прайшла інфармацыйная праграма “Стварачы жыццё сваёй мары”, арганізаваная ў рамках праекта “Кропка Адліку”.
На праграме былі разгледжаны тэхнікі НЛП (нейралінгвістычнага праграмавання), з дапамогай якіх можна навучыцца мадэляваць абставіны свайго жыцця.
Упершыню ў праекце “Кропка Адліку” прыняў удзел прадстаўнік далёкага замежжа – Джэк Маканіі, вядомы трэнер НЛП з дваццацігадовым стажам, аўтар шэрага кніг і відэаматэрыялаў з Даніі.
Па яго словах, наша ўсведамленне запоўнена бясконцым патокам думак, якія адцягваюць увагу і не даюць сканцэнтравацца на тым, чаго мы хочам. Значная частка нашых думак абумоўлена страхам, трывогай, сумненнямі. Замест таго каб сфакусавацца на сваёй мэце, мы часта канцэнтруемся на яе супрацьлегласці – страху і паражэнні, тым самым прывабліваючы непрыемнасці ў сваё жыццё.
Удзельнікам мерапрыемства былі прапанаваны некалькі практыкаванняў па візуалізацыі жаданняў, дадзены рэкамендацыі, як выразна фармуляваць мэты і жаданні, узмацніць творчы патэнцыял, змяніць вобраз сябе, які перашкаджае самому.
У праграме прынялі ўдзел больш за сто чалавек.
 |
 |
 |
 |
 |
 |
