Дэлегацыя “алмаза ведаў” з 15 па 21 мая ўзяла ўдзел у праекце “Адукацыйная калабарацыя бібліятэк Садружнасці” праграмы “Новае пакаленне”, які праходзіў пад патранажам Расійскай дзяржаўнай бібліятэкі.
Мэта навучальнага праекта – абмен вопытам бібліятэчнай дзейнасці, пашырэнне кругагляду, атрыманне новых навыкаў і ведаў у бібліятэчнай сферы, а таксама знаёмства з вядучымі бібліятэкамі краін СНД.
Ад Нацыянальнай бібліятэкі Беларусі ў праекце ўдзельнічалі Ірына Кашуба, бібліятэкар 2-й катэгорыі аддзела камплектавання фондаў, і Ганна Новікава, бібліятэкар 2-й катэгорыі аддзела бібліятэчна-інфармацыйных тэхналогій. У навучанні таксама прымалі ўдзел калегі з краін блізкага замежжа: Абхазіі, Азербайджана, Арменіі, Казахстана, Кыргызстана, Таджыкістана, Узбекістана і інш.
Праект уключаў двухэтапнае завочна-вочнае навучанне маладых спецыялістаў. На завочным этапе праходзілі практычныя заняткі па тэмах “Камунікацыйны менеджмент: псіхалогія кіравання”, “Лічбавае асяроддзе і бібліятэка” і “Інавацыі ў бібліятэцы”. Куратарамі адукацыйнай часткі выступілі Валянціна Садоўская, прафесар Маскоўскага дзяржаўнага інстытута культуры, і Яўгенія Гусева, дырэктар дэпартамента дзяржаўных і прыярытэтных праектаў Расійскай дзяржаўнай бібліятэкі.
У рамках вочнага этапа праекта супрацоўнікі Нацыянальнай бібліятэкі Беларусі ўзялі ўдзел ва ўрачыстым адкрыцці Усерасійскага бібліятэчнага кангрэса: XXVI Штогадовай канферэнцыі Расійскай бібліятэчнай асацыяцыі, якая праходзіла ў Ніжнім Ноўгарадзе, пабывалі на тэматычных пасяджэннях секцый кангрэса, а таксама наведалі мадэльную Цэнтральную раённую бібліятэку імя Ф.М. Дастаеўскага. Дэлегаты прынялі актыўны ўдзел у дыскусійнай пляцоўцы “Бібліятэчныя асацыяцыі свету”, дзе стваралі і абмяркоўвалі ідэі праектаў, накіраваныя на знаёмства з культурнымі традыцыямі краін СНД.
У Маскве госці наведалі Расійскую дзяржаўную бібліятэку для моладзі і Расійскую дзяржаўную дзіцячую бібліятэку. Пазнаёміліся са спецыфікай працы розных аддзелаў і абмяняліся практычным досведам.
Напрыканцы вочнага этапу навучання адбыўся візіт у Расійскую дзяржаўную бібліятэку, дзе прайшла ўрачыстая цырымонія ўручэння сертыфікатаў аб павышэнні кваліфікацыі, на якой з прывітальнымі словамі да ўдзельнікаў праекта звярнуліся Вадзім Дуда, генеральны дырэктар Расійскай дзяржаўнай бібліятэкі, прэзідэнт Бібліятэчнай асамблеі Еўразіі, і Павел Швецоў, намеснік кіраўніка Рассупрацоўніцтва.
Арганізатарамі праграмы выступілі Федэральнае агенцтва па справах Садружнасці Незалежных Дзяржаў, суайчыннікаў, якія пражываюць за мяжой, і па міжнародным гуманітарным супрацоўніцтве (Рассупрацоўніцтва) і Расійская дзяржаўная бібліятэка.
Матэрыял пададзены аддзелам бібліятэчна-інфармацыйных тэхналогій.
