Нагадаем, што “Книгуру” – найбуйнейшы ў Расіі конкурс твораў для юных чытачоў, заснаваны Федэральным агенцтвам па друку і масавых камунікацыях і Цэнтрам падтрымкі айчыннай славеснасці.
Маргарыта Латышкевіч, пісьменніца, літаратуразнаўца, член Саюза пісьменнікаў Беларусі і наша калега з аддзела суправаджэння інтэрнет-партала, стала паўфіналістам “Книгуру” – Усерасійскага конкурсу літаратурных твораў для дзяцей і моладзі! Яе аповесць “Лісіны пярсцёнак” – фэнтазі з элементамі беларускага легендарыума – увайшла ў лонг-ліст конкурсу. Беларускамоўны арыгінал твора друкаваўся ў часопісе “Полымя” №12 за 2019 год. Увогуле ж эксперты “Книгуру” разгледзелі каля 700 твораў, пададзеных на конкурс, і сфарміравалі доўгі спіс з 28 тэкстаў.
8 чэрвеня ў ZOOM на канале “Рабочий полдник” адбылося абвяшчэнне кароткага спісу адзінаццатага сезона конкурсу.
Гэтым разам у конкурсе ўдзельнічаюць, разам з заўсёднікамі, таксама і зусім новыя аўтары, што абяцае добрую будучыню падлеткавай літаратуры. Канечне, тэксты, якія трапілі ў паўфінал (або фінал) не з’яўляюцца “гатовымі да ўжывання” літаратурнымі прадуктамі. Часта патрабуецца дапрацоўка і прафесійная рэдактарская дапамога. Аднак творы, на думку экспертаў, досыць цікавыя.
Апроч таго, эксперты падкрэслілі: сапраўднае журы – гэта падлеткі, якія будуць чытаць выкладзеныя ў свабодны доступ творы. Увогуле ж асноўная мэта “Книгуру” – адкрыццё новых імёнаў, і менавіта таму сярод экспертаў прысутнічаюць прадстаўнікі выдавецтваў (“Самокат”, “Волчок”).
Кожны з экспертаў падзяліўся ўласным уражаннем ад конкурсу. Так, пісьменнік Шаміль Ідзіятулін адзначыў жанравую і эмацыйную разнастайнасць твораў. Ірына Балахонава, стваральніца выдавецтва “Самакат”, аднаго з самых актыўных партнёраў “Книгуру”, выказала сваю перакананасць, што конкурсныя тэксты не пакінуць дзяцей абыякавымі, – а гэта ж самае важнае.
Для кароткага спісу, з якім можна пазнаёміцца на сайце конкурсу, было адабрана пятнаццаць аўтараў. Адзін з экспертаў “Книгуру”, педагог Ірына Лук’янава распавяла, што зрабіць гэта было сапраўды няпроста – з маральнага і літаратурнага пунктаў гледжання.
У далейшым рукапісы з шорт-ліста будуць выкладзеныя ў адкрыты доступ на сайце конкурсу, дзе прадстаўнікі мэтавай аўдыторыі – падлеткі – змогуць іх ацаніць і пракаментаваць. Галасаванне будзе доўжыцца да верасня.
Матэрыял падрыхтаваны аддзелам суправаджэння інтэрнет-партала.
