22 лютага адбылося пасяджэнне Каардынацыйнага савета па распрацоўцы і рэалізацыі сумесных праграм супрацоўніцтва паміж органамі дзяржаўнага кіравання і Беларускай праваслаўнай царквой.
Пасяджэнне на тэму “Аб ходзе выканання ў 2016 годзе Праграмы супрацоўніцтва паміж Міністэрствам адукацыі Рэспублікі Беларусь і Беларускай праваслаўнай царквой на 2015–2020 гады” прайшло ў храме-помніку ў гонар Усіх святых.
Удзел у пасяджэнні прынялі: міністр адукацыі Рэспублікі Беларусь І.В. Карпенка, мітрапаліт Мінскі і Заслаўскі, Патрыяршы Экзарх усяе Беларусі Павел, упаўнаважаны па справах рэлігій і нацыянальнасцей Л.П. Гуляка, старшыня Сінадальнага аддзела рэлігійнай адукацыі і катэхізацыі, епіскап Барысаўскі і Мар'інагорскі Веньямін, кіраўнікі і педагогі ўстаноў адукацыі, святары, прадстаўнікі іншых міністэрстваў і ведамстваў Рэспублікі Беларусь. Ад Нацыянальнай бібліятэкі Беларусі ўдзел у пасяджэнні Каардынацыйнага савета прыняла галоўны бібліятэкар НДА бібліятэказнаўства В.А. Рынкевіч.
Пасяджэнне адкрылася прывітальным словам міністра адукацыі. Ігар Васільевіч адзначыў, што рэалізацыя задач Праграмы супрацоўніцтва паміж Міністэрствам адукацыі Рэспублікі Беларусь і Беларускай праваслаўнай царквой на 2015–2020 гады садзейнічае галоўнай мэце адукацыі – фарміраванню ў дзяцей і моладзі актыўнай жыццёвай пазіцыі, заснаванай на духоўна-маральным і прававым падмурку, і выказаў надзею на поспех і плённасць такога супрацоўніцтва.
Са словамі прывітання да ўдзельнікаў пасяджэння Каардынацыйнага савета звярнуўся мітрапаліт Мінскі і Заслаўскі Павел. Патрыяршы Экзарх выказаў перакананасць у тым, што толькі ў мудрым супрацоўніцтве дзяржава і царква змогуць пасеяць у светапоглядзе, які фарміруецца ў падрастаючага пакалення, добрае насенне веры, дабрыні, гонару, сумлення і іншых станоўчых якасцей.
Выступаючы з прывітальным словам, упаўнаважаны па справах рэлігій і нацыянальнасцей Л.П. Гуляка адзначыў, што на дадзены момант дагаворы аб супрацоўніцтве з Беларускай праваслаўнай царквой заключылі 16 міністэрстваў, ведамстваў і грамадскіх арганізацый. Ён падкрэсліў значнасць укладу праваслаўнай царквы ў патрыятычнае духоўна-маральнае выхаванне падрастаючага пакалення, развіццё традыцый міласэрнасці ў адносінах да інвалідаў, ветэранаў вайны і працы.
В.А. Рынкевіч выступіла з дакладам “Роля бібліятэк у духоўна-маральнай асвеце і выхаванні падрастаючага пакалення”. Акцэнтуючы ў сваім дакладзе ўвагу на дзейнасці бібліятэк устаноў адукацыі, яна адзначыла, што бібліятэкі Беларусі з'яўляюцца актыўнымі суб'ектамі ў працэсе духоўна-маральнай асветы і выхавання падрастаючага пакалення і сваёй дзейнасцю ўмацоўваюць грамадскую думку ў тым, што ад маральных перакананняў, маральных норм і духоўных каштоўнасцей членаў грамадства, іх грамадзянскай пазіцыі і жыццёвых прыярытэтаў залежыць узровень развіцця, дасягнуты дзяржавай.
У завяршэнне пасяджэння адбыўся канцэрт дзіцяча-юнацкага хору Усіхсвяцкага прыходу.