21 красавіка ў рамках XXIV Міжнароднага спецыялізаванага форуму па тэлекамунікацыях, інфармацыйных і банкаўскіх тэхналогіях “ТІБО” адбылася канферэнцыя “Е-Culture – электронная культура”.
Арганізатарамі мерапрыемства, якое прайшло ў канферэнц-зале № 1 Футбольнага манежа, выступілі Міністэрства культуры Рэспублікі Беларусь і Нацыянальная бібліятэка Беларусі.
З прывітальным словам да ўдзельнікаў звярнуўся намеснік міністра культуры А.А. Яцко.
У рабоце канферэнцыі прынялі ўдзел кіраўнікі і спецыялісты вядучых устаноў культуры, прадстаўнікі ІТ-кампаній нашай краіны, супрацоўнікі навуковых інстытутаў Нацыянальнай акадэміі навук Беларусі.
У дакладах, прысвечаных інфармацыйна-камунікацыйным тэхналогіям у сферы культуры, былі закрануты самыя розныя аспекты выкарыстання інавацый у сацыякультурнай дзейнасці, перспектыўныя напрамкі інфармацыйна-тэхналагічнага развіцця і папулярызацыі гісторыка-культурнай спадчыны ў электронным асяроддзі.
Спецыялісты Аб’яднанага інстытута праблем інфарматыкі НАН Беларусі, Нацыянальнага гістарычнага музея, Нацыянальнага мастацкага музея, Музея гісторыі горада Мінска, Нацыянальнай бібліятэкі Беларусі, Рэспубліканскай навукова-тэхнічнай бібліятэкі і інш. падзяліліся ўнікальным вопытам па ўкараненні сучасных інфармацыйна-камунікацыйных тэхналогій у дзейнасць устаноў.
Акрамя прадстаўнікоў дзяржаўных арганізацый, самы актыўны ўдзел у канферэнцыі прынялі кіраўнікі і спецыялісты шэрагу IT-кампаній – “Астронім-сістэмс”, “Арт-студыя PRAS” і інш. Яны пазнаёмілі ўдзельнікаў канферэнцыі з актуальнымі прапановамі і інавацыйнымі распрацоўкамі айчынных і замежных спецыялістаў, якія ўяўляюць цікавасць для прафесійнай дзейнасці ў сферы культуры і мастацтва.