Юныя чытачы актыўна прынялі ўдзел у конкурсе да 85-годдзя з дня нараджэння народнага паэта Беларусі Рыгора Барадуліна, які арганізавала Нацыянальная бібліятэка Беларусі. Прадстаўляем частку творчых работ канкурсантаў, прысвечаных тэме бацькоўскага дому. Яны цёплыя і кранальныя, прасякнуты вялікай любоўю да малой радзімы, маці і роднай мовы.
“Якая радасць у мяне, калі дадому завітаю!”, “Трэба дома бываць часцей…” – знакамітыя радкі з вершаў Рыгора Барадуліна. Глыбока народным укладам жыцця сям'і, песнямі, казкамі і прыказкамі матуля, звычайная беларуская сялянка, працаўніца і песенніца Куліна Андрэеўна і бабуля па мацярынскай лініі Малання Несцераўна ўдыхнулі ў душу хлапчука адчуванне прыгажосці і любові да бацькоўскага дому і роднага слова. І невыпадкова ў паэзіі Р. Барадуліна так многа твораў – прысвячэнняў матулі.
Вершы вучаць нас, чытачоў, разуменню матчынай дабрыні і шчырасці і, канечне ж, засцерагаюць, каб не чыніць крыўды матулі – самаму дарагому чалавеку на свеце. Ад маці засвойваў Рыгор беларускі фальклор і народную мову, што яшчэ ў дзяцінстве стала для яго святыняй.
Прадстаўляем творчыя работы ўдзельнікаў конкурсу, якім тэмы роднага дому, маці і беларускай мовы адгукнуліся найбольш.
Матэрыял пададзены навукова-даследчым аддзелам кнігазнаўства.