Якая была тэхналогія друку выяў чатыры стагоддзі назад і ці захавалася яна? Ці магчыма паўтарыць працу майстра-гравёра ў сённяшніх умовах?
Адказы на гэтыя пытанні можна знайсці на выставе “Узноўлены шэдэўр” у музеі кнігі Нацыянальнай бібліятэкі Беларусі. У экспазіцыі ўпершыню дэманструецца арыгінальная гравіравальная дошка ХVII ст. і ўзноўленая з яе гравюра з партрэтам караля і вялікага князя Яна ІІІ Сабескага.
Унікальны экспанат прадастаўлены з прыватнага збору калекцыянера Алега Судлянкова.
Мы падрыхтавалі для вас не толькі выставу, але і цікавае відэа, якое пакрокава паказвае працэс узнаўлення гравюры з рарытэтнай дошкі ХVII ст. У кадры – мастак-графік Віктар Саўчанка, які “ажывіў” для нас у сваёй майстэрні старажытную тэхналогію друку.
Праца мастака заварожвае. Далучайцеся да прагляду і на свае вочы пабачыце, як узнаўляўся шэдэўр гравіравальнага мастацтва.
Выстава “Узноўлены шэдэўр” будзе працаваць у музеі кнігі да 30 мая 2021 г.
Час работы выставы адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.
Матэрыял пададзены навукова-даследчым аддзелам кнігазнаўства.