15 снежня ў Нацыянальнай бібліятэцы Беларусі адбылася ўрачыстая цырымонія перадачы Выдавецтвам Беларускага экзархата факсімільнага выдання Слуцкага Евангелля ў дар Нацыянальнай бібліятэцы Беларусі і бібліятэкам краіны.
Арганізатары мерапрыемства, якое адбылося ў рамках праекта “Вяртанне святынь”, – Міністэрства культуры Рэспублікі Беларусь, Беларуская праваслаўная царква, Нацыянальная бібліятэка Беларусі.
У 2009 г. Выдавецтва Беларускага экзархата падрыхтавала і выдала факсімільнае выданне Слуцкага Евангелля, якое з’яўляецца практычна дакладнай копіяй рукапіснага помніка XVI ст. Па ўзроўні выканання выданне не мае аналагаў у Беларусі. За выданне Слуцкага Евангелля і духоўна-асветніцкую дзейнасць Выдавецтва Беларускага экзархата ўдастоена прэміі “За духоўнае адраджэнне” Прэзідэнта Рэспублікі Беларусь, вышэйшых узнагарод у галіне кнігавыдавецтва на Нацыянальным конкурсе “Мастацтва кнігі – 2010” і Міжнародным конкурсе “Мастацтва кнігі – 2010” краін – удзельніц СНД у Маскве.
З прывітальным словам выступіў дырэктар Выдавецтва Беларускага экзархата іерэй Яўген Лабынька. Падчас урачыстага мерапрыемства член выдавецкага савета Рускай праваслаўнай царквы, выканаўчы дырэктар Выдавецтва Беларускага экзархата Уладзімір Грозаў перадаў дырэктару Нацыянальнай бібліятэкі Беларусі Раману Матульскаму і дырэктарам буйнейшых бібліятэк краіны факсімільнае выданне Слуцкага Евангелля, якое зойме годнае месца ў фондах бібліятэк.
Праграма мерапрыемства змяшчала паказ фільма пра рэспубліканскую духоўна-асветніцкую праграму “Сям’я – Яднанне – Айчына”, музычна-тэатралізаванае прадстаўленне-дэманстрацыю Слуцкага Евангелля ў выкананні камернага духоўнага тэатра Цэнтра праваслаўнай культуры “Спадарожнік хрысціяніна” і выступленне вядомага вакальнага мужчынскага ансамбля “Благовест” Выдавецтва Беларускага экзархата.
|
|
|
