У бібліятэцы штомесяц адбываюцца сустрэчы ў “Клубе кніжных прафесараў”. Удзельнікі клуба пазнаюць разнастайнасць сусветнай кнігі і ўнікальнасць беларускай кніжнай культуры.
Пасля заняткаў “Папяровыя цуды” юныя “прафесары” атрымалі творчае дамашняе заданне – зрабіць макет Нацыянальнай бібліятэкі з паперы, сфатаграфавацца з ім і даслаць на старонку праекта “У госці да кніг” у сацсеціве “ВКонтакте”.
Безумоўным пераможцам задання “Нацыянальная бібліятэка Беларусі – дома” стаў Цімох Сямашка. Фотаздымкі напоўнены крэатывам і пазітывам! Нацыянальная бібліятэка аб’яднала ўсю сям’ю, якая прыняла ўдзел у стварэнні макета і фотасесіі.
Партнёрам мерапрыемства выступіў праект “Белзамкі”, які распрацаваў унікальны макет Нацыянальнай бібліятэкі Беларусі. Набыць макет бібліятэкі можна ў кіёску, што размешчаны на 1-м паверсе каля галоўнага ўвахода.
Вырабы з паперы, зробленыя сваімі рукамі, стымулююць творчае ўяўленне, фарміруюць пачуццё гармоніі і прапорцый. Канструяванне з паперы развівае ўвагу, маторыку рук, прасторавае мысленне, цярплівасць і ўседлівасць.
Для дзяцей гэта вельмі цікавая магчымасць – ствараць аб’ёмную папяровую мадэль Нацыянальнай бібліятэкі Беларусі, якую можна скарыстаць у гульнях, падарыць як сувенір ці ўпрыгожыць ёю пакой.
Фотаздымкі ўсіх удзельнікаў задання “Нацыянальная бібліятэка Беларусі – дома” можна паглядзець тут.
