19 студзеня ў бібліятэцы адбылася першая публічная лекцыя “Крыніцы гістарычнай памяці”, прысвечаная Году гістарычнай памяці.
З тэмай “Беларуская літаратура эпохі готыкі, рэнесансу і барока” выступіў вядомы беларускі вучоны, дырэктар Інстытута літаратуразнаўства імя Янкі Купалы, член праўлення Саюза пісьменнікаў Беларусі, доктар філалагічных навук, прафесар Іван Саверчанка.
На мерапрыемстве абмеркавалі актуальныя пытанні развіцця беларускай літаратуры і літаратуразнаўства, крыніцазнаўства, медыялінгвістыкі, пазнаёміліся з навуковымі выданнямі аб старабеларускай літаратуры XI–XVII стст., каштоўнымі помнікамі і здабыткамі нацыянальнага пісьменства і адзначылі, што залаты фонд беларускага народа і яго аналіз у навуковых даследаваннях трэба пераносіць у віртуальнае ассяроддзе.
Цікавасць да гісторыі і культуры праявілі вучоныя, студэнты, краязнаўцы, журналісты, бібліятэкары. Яны абнавілі і дапоўнілі ўласныя веды, вялі дыскусію з экспертам, асэнсоўваючы веліч мінулага.
Лекцыі “Крыніцы гістарычнай памяці” ладзяцца ў адкрытым для публікі фармаце і на бясплатнай аснове. Кожная сустрэча прысвечана важнай старонцы нашай мінуўшчыны, якую даследуюць з дапамогай гістарычных крыніц – летапісаў, рукапісных кніг, старадрукаў, даўніх карт, гравюр, падпольных і партызанскіх выданняў часоў вайны, твораў беларускай літаратуры і інш., якія захоўваюць гістарычную памяць беларускага народа.
Запісы мінулых лекцый і жывыя трансляцыі наступных можна будзе глядзець на канале YouTube па адрасе https://www.youtube.com/c/BelarusBook/videos.
Наступнае мерапрыемства адбудзецца 26 студзеня а 15-й гадзіне ў зале адукацыйных тэхналогій (пам. 346). Госцем і экспертам выступіць знакаміты гісторык беларускіх летапісных крыніц, кандыдат філалагічных навук Вячаслаў Чамярыцкі з тэмай “Беларускія летапісы і хронікі”.
Матэрыял пададзены аддзелам сувязей з грамадскасцю.
