3 лістапада ў Нацыянальнай бібліятэцы Беларусі адбыўся круглы стол “Сучасныя беларусы – чытаючая нацыя”.
У працы круглага стала ўзялі ўдзел намеснік міністра інфармацыі Рэспублікі Беларусь Ігар Бузоўскі, генеральны дырэктар Нацыянальнай бібліятэкі Беларусі Аксана Кніжнікава, дырэктар Інстытута сацыялогіі Нацыянальнай акадэміі навук Беларусі Мікалай Мыслівец, намеснік дырэктара Інстытута сацыялогіі НАН Беларусі Дзмітрый Бязнюк, дырэктар філіяла “Інстытут літаратуразнаўства імя Янкі Купалы” НАН Беларусі Іван Саверчанка, намеснік дырэктара выдавецтва “Харвест” Юрый Хацкевіч і іншыя запрошаныя госці.
Супрацоўнікі Інстытута сацыялогіі НАН Беларусі прадставілі вынікі сацыялагічнага даследавання “Аб чытацкіх перавагах беларусаў”. Амаль 50 % сярод апытаных рэгулярна бяруць у рукі кнігу (штодня або некалькі разоў на тыдзень), і ўсяго 15 % – не чытаюць зусім. Цікавы факт – больш за ўсё беларусам падабаецца мастацкая, навукова-папулярная і вучэбна-адукацыйная літаратура. Пры выбары чытачы арыентуюцца на жанр, меркаванне знаёмых ці родных, а таксама вядомасць аўтара і твора.
На мерапрыемстве эксперты абмеркавалі перавагі чытачоў розных узростаў, стан айчыннага кнігавыдання, павелічэнне колькасці выдаўцоў, пераход у лічбавае асяроддзе, фарміраванне каштоўнасцей у чытачоў і тэндэнцый у сучаснай культуры.
Прадстаўнікі выдавецтва “Харвест” і Інстытута сацыялогіі НАН Беларусі перадалі ў дар дзіцячую і навуковую літаратуру, якая папоўніць фонды Нацыянальнай бібліятэкі Беларусі.
Арганізатарамі мерапрыемства выступілі Інстытут сацыялогіі Нацыянальнай акадэміі навук Беларусі і Нацыянальная бібліятэка Беларусі.
Глядзіце таксама рэпартаж на "Беларусь 1".
Матэрыял пададзены аддзелам сувязей з грамадскасцю.
