24 чэрвеня ў Нацыянальнай бібліятэцы Беларусі адбыўся рэспубліканскі адкрыты дыялог “Моладзь Беларусі: рэаліі і перспектывы” з анлайн-падключэннем рэгіёнаў.
Праект грамадскага аб’яднання “Беларускі рэспубліканскі саюз моладзі” “Адкрыты дыялог” – шырокая дыскусійная пляцоўка, якая дае магчымасць моладзі Беларусі падымаць самыя вострыя праблемы і задаваць пытанні прадстаўнікам органаў улады, палітыкам, прадпрымальнікам, грамадскім дзеячам.
Удзельнікі дыялогу абмеркавалі ролю і месца моладзі ў рэалізацыі дзяржаўнай палітыкі, маладзёжныя ініцыятывы, шляхі іх рэалізацыі, рэаліі і перспектывы моладзі краіны. У анлайн-інтэрактыве са студыямі абласных камітэтаў БРСМ былі прадстаўлены творчыя прэзентацыі напрамкаў дзейнасці арганізацыі.
У рамках мерапрыемства адбылося падпісанне пагаднення аб супрацоўніцтве Беларускага рэспубліканскага саюза моладзі і Нацыянальнага цэнтра прававой інфармацыі Рэспублікі Беларусь.
Для ўдзельнікаў адкрытага дыялогу Нацыянальная бібліятэка Беларусі падрыхтавала кніжную экспазіцыю – выданні, прысвечаныя гісторыі Беларускага рэспубліканскага саюза моладзі ад часоў СССР да сучасных стратэгій развіцця, зборнікі, якія раскрываюць сучасныя і актуальныя напрамкі дзейнасці арганізацыі: грамадзянска-патрыятычнае выхаванне, валанцёрскі рух, інфармацыйна-іміджавую палітыку, праектную дзейнасць, студатрады, культурна-забаўляльныя акцыі і конкурсы.
Мерапрыемства прайшло ў рамках Года народнага адзінства і прымеркавана да нацыянальнага свята – Дня моладзі.
Арганізатары – Нацыянальная бібліятэка Беларусі, Цэнтральны камітэт Беларускага рэспубліканскага саюза моладзі.
Матэрыял пададзены аддзелам сувязей з грамадскасцю.