14 кастрычніка прайшла прэзентацыя кнігі “Белорусская государственная академия авиации: история и перспективы развития”.
У мерапрыемстве ўзялі ўдзел першы намеснік дырэктара Нацыянальнай бібліятэкі Беларусі Алена Далгаполава і рэктар Беларускай дзяржаўнай акадэміі авіяцыі Арцём Шагідэвіч.
На прэзентацыі выступіў былы начальнік Мінскага дзяржаўнага вышэйшага авіяцыйнага каледжа, член ветэранскай арганізацыі грамадзянскай авіяцыі Мікалай Сідаровіч. Ён расказаў пра гісторыю айчыннай авіяцыі, распавёў пра былыя заслугі галіны і пажадаў сучаснікам дабіцца вышынь у сферы адукацыі.
Юбілейная манаграфія прысвечана гісторыі стварэння, станаўлення, развіцця і ўдасканалення нацыянальнай школы падрыхтоўкі авіяцыйных спецыялістаў – ад Мінскага авіяцыйнага тэхнічнага вучылішча грамадзянскай авіяцыі да Беларускай дзяржаўнай акадэміі авіяцыі.
Экзэмпляр выдання папоўніў калекцыю Нацыянальнай бібліятэкі.
На прэзентацыі былі прадстаўлены выданні з фондаў “алмаза ведаў”. Гэта кнігі на тэму сусветнай і айчыннай гісторыі авіяцыі, як ваеннай, так і грамадзянскай, а таксама выданні, прысвечаныя гісторыі акадэміі-імянінніцы.
Матэрыял прадастаўлены аддзелам сувязей з грамадскасцю.
