Нацыянальная бібліятэка Беларусі ўзяла ўдзел у II Міжнароднай навукова-практычнай канферэнцыі “Кніга, чытанне і інстытуты памяці ў інфармацыйным грамадстве”, якая адбылася 24–27 мая ў Бішкеку (Кыргызская Рэспубліка).
Асноўнай мэтай мерапрыемства з’яўляецца павышэнне і ўмацаванне ў грамадскай свядомасці важнасці і актуальнасці праблем падтрымкі і развіцця чытання ў дзяржавах – удзельніцах СНД.
Генеральны дырэктар Нацыянальнай бібліятэкі Беларусі Аксана Юр’еўна Кніжнікава ўзяла ўдзел у канферэнцыі і выступіла з дакладам аб сучасных формах і метадах папулярызацыі кнігі і чытання з вопыту бібліятэкі.
Удзельнікі традыцыйна абмяркоўвалі актуальныя праблемы і перспектывы палітыкі і дзейнасці кожнай краіны СНД па падтрымцы і развіцці чытання, ролю кнігі і чытання ў вырашэнні сацыяльна значных праблем, шляхі і сродкі павышэння сацыяльнай эфектыўнасці праграм і праектаў па папулярызацыі чытання, а таксама развіццё міждзяржаўнага супрацоўніцтва ў сферы папулярызацыі чытання і медыйна-інфармацыйнай дасведчанасці.
У мерапрыемстве ўзялі ўдзел больш за 150 кіраўнікоў найбуйнейшых бібліятэк, выдавецтваў, прадпрыемстваў кніжнага гандлю, органаў улады і ўстаноў у сферы навукі і адукацыі, мастацтва і культуры, камунікацыі і інфармацыі, грамадскіх арганізацый і бізнесу з Азербайджана, Арменіі, Беларусі, Казахстана, Кыргызстана, Расіі, Туркменістана, Узбекістана.
У рамках канферэнцыі таксама адбыўся круглы стол на тэму “Музейная справа і ахова культурных каштоўнасцей”, прысвечаны 95-годдзю з дня нараджэння Чынгіза Айтматава.
Па выніках форуму была прынята рэзалюцыя, а таксама апублікаваны электронны зборнік матэрыялаў канферэнцыі.
Арганізатарамі канферэнцыі выступілі Міжрэгіянальны цэнтр бібліятэчнага супрацоўніцтва, Расійскі камітэт праграмы ЮНЕСКА “Інфармацыя для ўсіх”, Нацыянальны гістарычны музей Кыргызскай Рэспублікі пры падтрымцы Міждзяржаўнага фонду гуманітарнага супрацоўніцтва дзяржаў – удзельніц СНД і Міністэрства культуры, інфармацыі, спорту і маладзёжнай палітыкі Кыргызскай Рэспублікі.
Матэрыял пададзены аддзелам сувязей з грамадскасцю.
