“Справаздачу аб рабоце падпольнай арганізацыі Чачэльніцкага р-на Вінніцкай вобласці” перадаў з сямейнага архіва Пракофій Рыгоравіч Максіменка. Яго маці, Эстэр Ізраілаўна Гольдшміт, падчас вайны была сакратаром падпольнай арганізацыі.
Рукапісны дакумент прыняла ў фонд бібліятэкі намеснік генеральнага дырэктара – дырэктар па інфармацыйных рэсурсах Т.В. Кузьмініч.
Рукапіс уяўляе сабой асобныя незбрашураваныя лісты са сшытка з рукапісным тэкстам у пацёртай вокладцы малінава-чорнага колеру. Папера з часам пажаўцела, лісты зачытаныя і не вельмі добра захаваліся: дзённік вялі ў надзвычай складаны час, не раз перачытвалі. Гэта дакументальнае сведчанне дзейнасці падпольнай арганізацыі Чачэльніцкага раёна Вінніцкай вобласці з 1942 па 1944 год, дзе занатаваны падзеі жыцця, звесткі аб баявых заданнях, спісы членаў падпольнай групы.
Э.І. Гольдшміт з таварышамі. Фота з сямейнага архіва П.Р. Максіменкі
Нацыянальная бібліятэка Беларусі дзякуе Пракопу Рыгоравічу за каштоўны дар, перададзеныя з асабістага архіва фатаграфіі, клопат аб захаванні дакументальнай гістарычнай спадчыны.
Матэрыял пададзены аддзелам фарміравання электроннай бібліятэкі.
