20 лютага ў Мінскай абласной бібліятэцы імя А.С. Пушкіна адбыўся практыкум “Ужыванне Універсальнай дзесятковай класіфікацыі на беларускай мове для арганізацыі краязнаўчага фонду публічнай бібліятэкі і яго адлюстравання ў электронным каталогу”, падрыхтаваны Нацыянальнай бібліятэкай Беларусі.
У мерапрыемстве прынялі ўдзел намеснік генеральнага дырэктара – дырэктар па інфармацыйных рэсурсах Таццяна Кузьмініч, загадчык аддзела індэксавання дакументаў Святлана Пугачова, загадчык сектара індэксавання дакументаў па гуманітарных навуках Нацыянальнай бібліятэкі Беларусі Алена Сідарэнка, супрацоўнікі Мінскай абласной бібліятэкі імя А.С. Пушкіна, бібліятэкі Нацыянальнага мастацкага музея Рэспублікі Беларусь.
Падчас практыкуму была прадстаўлена інфармацыя аб “Універсальнай дзесятковай класіфікацыі” (УДК) як міжнароднай класіфікацыйнай сістэме, выданні УДК на беларускай мове (Мінск, 2016), а таксама прапанаваны перспектывы далейшага развіцця УДК на беларускай мове, альтэрнатыўнасць яе прымянення для сістэматызацыі дакументаў, арганізацыі фондаў, вядзення картачных сістэматычных каталогаў і пошуку інфармацыі ў публічных бібліятэках.
Прапануем паслугу “Індэксаванне дакументаў: УДК, ДРНТІ, ББК”
У рамках практыкума прайшоў майстар-клас па індэксаванні дакументаў гуманітарнай і грамадска-палітычнай тэматыкі з ужываннем УДК, разгледжаны метадычныя рашэнні па складаных выпадках прыняцця класіфікацыйных рашэнняў.
Слухачы пазнаёміліся з фарміраваннем пошукавага вобраза дакументаў і рэалізацыяй тэматычнага пошуку ў электронным каталогу НББ па УДК, новымі метадычнымі распрацоўкамі НББ і бібліятэк-удзельніц карпаратыўнай каталагізацыі і вядзення Зводнага электроннага каталога бібліятэк Беларусі.
Матэрыял прадастаўлены аддзелам індэксавання дакументаў.