Электронная калекцыя “Майстры беларускай культуры. Уладзімір Правідохін «Творчыя метамарфозы»” папоўнілася новымі выяўленчымі дакументамі вядомага беларускага графіка Уладзіміра Хіна.
Галоўнае – убачыць сябе ў патоку і не перашкаджаць іншым.
Сувымераць сябе ў адносінах да Сусвету…
Уладзімір Хін, графік, мастак
Сярод навінак у электронным рэсурсе прадстаўлена калекцыя паштовак і эстампаў.
Пры стварэнні эстампаў Уладзімір Хін знаходзіць новыя выяўленчыя сродкі, новыя ідэі, вобразы і мастацкія прыёмы, якія ўзбагачаюць беларускі эстамп.
Асаблівае месца ў электроннай калекцыі займае аўтарская віншавальная паштоўка. На думку мастака, яна з’яўляецца малой часткай візуальнай культуры, якая аб’ядноўвае людзей і нейкім чынам звязвае іх.
Асаблівую цікавасць заслугоўваюць паштоўкі, прысвечаныя порам года.
Уладзімір Андрэевіч Правідохін разважае пра гэта так: “Гэта асабістыя знакі-сімвалы пор года, якія дапамагаюць людзям здабыць унутраную свабоду пры сустрэчы з паштоўкай...”.
Верасень, кастрычнік, лістапад. 2017
Унікальныя фатаграфіі з асабістага архіва мастака прадстаўлены на віртуальнай выставе “Уладзімір Хін. Люстэрка душы графіка”. Многія з іх экспануюцца ўпершыню і раскрываюць малавядомыя моманты біяграфіі выбітнага беларускага графіка.
Сямейная фотахроніка дазваляе прасачыць жыццёвы і творчы шлях Уладзіміра Правідохіна ад майстэрні, адкуль пачалася яго дарога ў цудоўны свет выяўленчага мастацтва, да залаў персанальных выстаў па ўсім свеце. Бацькі, жонка, настаўнік – уся гісторыя жыцця мастака адлюстравана ў фотаздымках.
Уладзімір Андрэевіч Правідохін (Уладзімір Хін) – вядомы беларускі мастак, сябра Саюза мастакоў СССР, сябра Беларускага саюза мастакоў. Яго працы захоўваюцца ў Нацыянальным мастацкім музеі Рэспублікі Беларусь, Нацыянальнай бібліятэцы Беларусі, Музеі Марка Шагала ў Віцебску, Полацкім гісторыка-культурным музеі-запаведніку, а таксама ў музеях Расіі, ЗША, Германіі і прыватных калекцыях Францыі, Ізраіля, Швейцарыі і інш.
Матэрыял пададзены аддзелам фарміравання электроннай бібліятэкі.
