З 20 верасня па 21 кастрычніка ў Мінску можна будзе пабачыць самыя старажытныя дакументальныя помнікі сусветнага значэння.
Скруткі Мёртвага мора, біблейскія рукапісныя тэксты на папірусе і пергамене, гліняныя таблічкі з клінапісным тэкстам, вельмі каштоўныя сярэдневяковыя еўрапейскія манускрыпты, біблейскія першадрукі розных краін свету, старадрукаваныя Паліглоты (шматмоўныя тэксты Святога Пісання), унікальныя ілюстраваныя асобнікі Бібліі розных культурных традыцый і, натуральна, прыклады сакральнага пісьменства Беларусі – усё гэта будзе прадстаўлена на міжнароднай выстаўцы “Беларусь і Біблія”, якая пройдзе ў Нацыянальнай бібліятэцы. Біблія да гэтага часу застаецца самай вядомай і ўплывовай кнігай у гісторыі чалавецтва, самай шматтыражнай і самай перакладаемай кнігай усіх часоў.
Адпаведны дагавор аб супрацоўніцтве паміж Нацыянальнай бібліятэкай Беларусі і недзяржаўнай арганізацыяй “Група даследавання рукапісаў” (ЗША) быў падпісаны 25 мая. У цырымоніі прынялі ўдзел дырэктар Нацыянальнай бібліятэкай Беларусі Раман Матульскі, намеснік дырэктара па навуковай рабоце і выдавецкай дзейнасці Аляксандр Суша, дырэктар арганізацыі “Група даследаванняў рукапісаў” Скот Кэрал, выканаўчы дырэктар праекта Inspired Дэвід Эдзінгтан, арганізатар праекта Павел Дзячэнка, а таксама прадстаўнікі навуковых і грамадскіх арганізацый.
Вельмі сімвалічна, што падпісанне дагавора супала са святкаваннем Дня славянскага пісьменства і культуры, прымеркаванага да дня памяці асветнікаў Кірыла і Мяфодзія. Менавіта яны ўпершыню пераклалі Біблію на славянскую мову і далі славянскім народам магчымасць развіваць пісьмовае слова.