29 снежня ў Нацыянальнай бібліятэцы адбылася прэзентацыя самай вялікай, маштабнай і комплекснай працы ў найноўшай гісторыі беларускай дзяржавы – даследавання “Республика Беларусь: 25 лет созидания и свершений”. Выданне выйшла ў свет у гэтым годзе ў выдавецтве “Беларуская навука”. Галаўной арганізацыяй па падрыхтоўцы і выпуску выдання стала Нацыянальная акадэмія навук Беларусі.
Удзел у прэзентацыі прынялі старшыня прэзідыума НАН Беларусі Уладзімір Гусакоў, першы намеснік старшыні прэзідыума НАН Беларусі Сяргей Чыжык, генеральны дырэктар Нацыянальнай бібліятэкі Беларусі Раман Матульскі, супрацоўнікі і чытачы бібліятэкі.
Фундаментальнае і наватарскае даследаванне адлюстроўвае сучасны погляд на Беларусь і станаўленне нашай суверэннай дзяржавы. У сваім уступным слове Уладзімір Рыгоравіч адзначыў вялікі аб’ём праведзенай аўтарамі працы і іх унёсак у аналіз працэсу станаўлення суверэннай дзяржавы Рэспублікі Беларусь. Прэзентуючы выданне, ён згадаў што “дадзеным значным даследаваннем займалася больш за 400 аўтараў, у тым ліку супрацоўнікі Нацыянальнай бібліятэкі. Творчы калектыў арыентаваўся на навукова-папулярны пераказ матэрыялу і яго даступнасць для чытачоў розных узроставых груп”.
Гісторыю нашай краіны ўдалося аб’яднаць у сямі маляўніча ілюстраваных тамах. Кожны том адлюстроўвае найважнейшыя вынікі ўмацавання нацыянальнай дзяржаўнасці: інстытуты ўлады і кіравання, правы і свабоды грамадзян, эканамічная мадэль, развіццё прамысловасці, аховы здароўя і адукацыі, фізічнай культуры і спорту, архітэктуры і горадабудаўніцтва, мовы і літаратуры, мастацтва.
На прэзентацыі Раман Матульскі падкрэсліў: “Нацыянальная акадэмія навук, наш даўні партнёр, стварыла сапраўдны шэдэўр паліграфіі! Гэта своеасаблівая багатая і ілюстраваная энцыклапедыя, што ёсць працягам цудоўных існуючых навуковых традыцый і той вялікай працы, якая прароблена НАН. Гэта ўсё тое, што так ці інакш, тычыцца кожнага жыхара нашай краіны”.
Стваральная дзейнасць беларускага народа, творчыя здзяйсненні і дасягненні незалежнай Беларусі патрабуюць глыбокага асэнсавання. Навуковы аналіз і яго асэнсаванне дазволіць атрымаць урокі, здабыць трывалы падмурак нацыянальнай дзяржаўнасці і пераканацца ў правільнасці абранага шляху.
Напрыканцы мерапрыемства Уладзімір Гусакоў зрабіў Нацыянальнай бібліятэцы цудоўны пераднавагодні падарунак – перадаў у яе фонды прэзентаванае даследаванне “Республика Беларусь: 25 лет созидания и свершений”. Азнаёміцца з выданнем можна ў музеі кнігі (пам. 347).
Матэрыял пададзены аддзелам сувязей з грамадскасцю.
