15–16 лістапада ў г. Вільнюсе (Літоўская Рэспубліка) прайшла міжнародная навуковая канферэнцыя, у якой прыняў удзел намеснік дырэктара Нацыянальнай бібліятэкі Беларусі А.А. Суша.
Ініцыятарамі правядзення канферэнцыі “Вернутае мінулае: феномен прафесара Льва Уладзімірава і распаўсюджванне яго ідэй” сталі бібліятэка і факультэт камунікацыі Вільнюскага ўніверсітэта.
Канферэнцыя была прысвечана 100-годдзю з дня нараджэння выдатнага бібліятэчнага дзеяча Літвы Л.І. Уладзімірава, яго працам і іх уплыву на развіццё тэорыі і практыкі бібліятэказнаўства і інфармацыйных навук. Ён стаў ініцыятарам і галоўным удзельнікам працэсу вяртання ў Літву вывезеных раней кніжных збораў. У сувязі з гэтым у задачы канферэнцыі ўваходзіў комплекс пытанняў пра лёс і праблемы захавання для будучых пакаленняў помнікаў культурнай спадчыны, пра вопыт алічбоўкі помнікаў культуры ў Літве і за мяжой, пра выклікі сучаснасці і ролю супрацоўнікаў бібліятэк, музеяў і архіваў у кантэксце працэсаў захавання культурнай спадчыны і абслугоўвання чытачоў.
Удзел у канферэнцыі прынялі навуковыя, грамадскія і культурныя дзеячы Літвы і шэрагу замежных краін. Адным з удзельнікаў і членаў арганізацыйнага камітэта канферэнцыі стаў намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Аляксандр Суша, які выступіў з паведамленнем “Прафесар Леў Уладзіміраў і даследаванне спадчыны Францыска Скарыны”.
 |
 |
