10–11 лістапада ў Нацыянальнай бібліятэцы Беларусі адбыліся VII Міжнародныя кнігазнаўчыя чытанні “Бібліятэкі і палітыка адкрытага доступу да інфармацыі і ведаў”.
Арганізатарамі канферэнцыі выступілі Міністэрства культуры Рэспублікі Беларусь, Бібліятэчная асамблея Еўразіі, Беларуская бібліятэчная асацыяцыя, Нацыянальная бібліятэка Беларусі, Нацыянальны гісторыка-культурны музей-запаведнік “Нясвіж”.
У мерапрыемстве ўзялі ўдзел каля 300 дэлегатаў з Беларусі, Расіі, Украіны, Літвы, Швейцарыі – вядучыя спецыялісты бібліятэк, музеяў, архіваў, выдавецтваў, адукацыйных і навукова-даследчых устаноў і арганізацый, прадстаўнікі заканадаўчай сферы і органаў выканаўчай улады, вытворцы праграмнага забеспячэння, тэхнічных сродкаў і інфармацыйнай прадукцыі.
У рамках VII Міжнародных кнігазнаўчых чытанняў адбылося праблемнае абмеркаванне “Інфармацыйныя паводзіны карыстальнікаў: аб правядзенні рэспубліканскага даследавання”. На працягу двух дзён працаваў міжнародны круглы стол “Кніга Беларусі ў кантэксце кнігазнаўчых даследаванняў”.
Важнай падзеяй другога дня канферэнцыі стала правядзенне выязнога круглага стала “Захаванне культурнай спадчыны” ў Нацыянальным гісторыка-культурным музеі-запаведніку “Нясвіж”. Таксама ў гэты дзень прайшоў семінар “Рэсурсы адкрытага доступу: падыходы да стварэння і выкарыстання” і працавала тэматычная секцыя “Кадравае забеспячэнне дзейнасці бібліятэк. Бібліятэчная інаватыка”.
Вынікам работы канферэнцыі стала прыняцце рашэнняў, якія будуць садзейнічаць развіццю свабоднага і раўнапраўнага доступу да інфармацыі і ведаў, стануць значным укладам у далейшы інтэлектуальны росквіт грамадства.
Чытайце таксама:
Адкрыццё VII Міжнародных кнігазнаўчых чытанняў
 |
 |
 |
 |
 |
 |
 |
 |
 |
