Віртуальная чытальная зала Нацыянальнай бібліятэкі Беларусі працягвае знаёміць спецыялістаў і карыстальнікаў бібліятэк нашай краіны з магчымасцямі выкарыстання электронных інфармацыйных рэсурсаў. У рамках гэтай працы 19 і 20 лютага прайшла серыя семінараў ВЧЗ у бібліятэках Брэста.
Семінары арганізаваны Нацыянальнай бібліятэкай Беларусі сумесна з электронна-бібліятэчнай сістэмай “Лань”. Прэзентацыі для ўдзельнікаў правялі загадчыца аддзела карпаратыўнага ўзаемадзеяння Нацыянальнай бібліятэкі Беларусі Марына Рудакоўская і намеснік дырэктара ЭБС “Лань” Святлана Шнурава.
У Брэсцкай абласной бібліятэцы імя М. Горкага ўдзельнікамі семінара сталі не толькі супрацоўнікі бібліятэкі, але і прадстаўнікі ўсіх цэнтралізаваных бібліятэчных сістэм вобласці. Мерапрыемства адкрыла дырэктар абласной бібліятэкі Алена Стрыжэвіч. Для слухачоў быў прадстаўлены спектр электронных інфармацыйных рэсурсаў ВЧЗ і шматлікія магчымасці працы з імі пры абслугоўванні розных катэгорый карыстальнікаў.
Падрабязна былі разгледжаны кантэнт электронна-бібліятэчнай сістэмы “Лань”, яе пошукавыя механізмы, асаблівасці функцыяналу для карыстальнікаў і бібліятэкараў, а таксама перавагі выкарыстання сістэмы пры рэалізацыі інклюзіўнай адукацыі.
Асаблівую цікавасць прадстаўнікоў публічных бібліятэк Брэсцкага рэгіёну выклікала прэзентацыя новага электроннага праекта Нацыянальнай бібліятэкі Беларусі – тэматычнага сайта “Беларусь у інфармацыйнай прасторы” – вэб-навігатара па інфармацыйных рэсурсах пра Беларусь, да ўдзелу ў фарміраванні якога запрашаюцца публічныя бібліятэкі краіны.
Слухачы семінара плённа абмеркавалі перавагі і перспектывы карпаратыўнага ўзаемадзеяння Нацыянальнай бібліятэкі Беларусі і бібліятэк Брэсцкай вобласці ў сферы камплектавання фондаў ліцэнзійнымі інфармацыйнымі рэсурсамі, генерацыі ўласных электронных рэсурсаў і іх папулярызацыі праз прадстаўленне ў віртуальнай чытальнай зале.
Семінар у бібліятэцы Брэсцкага дзяржаўнага тэхнічнага ўніверсітэта сабраў прадстаўнікоў кіраўніцтва і прафесарска-выкладчыцкага складу, маладых вучоных і студэнтаў універсітэта, супрацоўнікаў універсітэцкай бібліятэкі. Для іх былі прадстаўлены вядучыя сусветныя ліцэнзійныя рэсурсы для інфармацыйнага забеспячэння вышэйшай адукацыі і навукі, праведзены інтэрактыўны майстар-клас па працы з ЭБС “Лань”. Прадстаўнікі ўніверсітэта азнаёміліся з карпаратыўнымі праектамі Нацыянальнай бібліятэкі і выказалі шэраг прапаноў па ўдзеле ўніверсітэта ў фарміраванні карпаратыўных інфармацыйных рэсурсаў.
Матэрыял прадастаўлены аддзелам карпаратыўнага ўзаемадзеяння.