28 сакавіка бібліятэку наведала дэлегацыя Генеральнай пракуратуры Рэспублікі Малдова на чале з генеральным пракурорам Эдуардам Харунжанам.
Падчас экскурсіі ганаровыя госці пазнаёміліся з гісторыяй Нацыянальнай бібліятэкі Беларусі, ацанілі архітэктурныя асаблівасці будынка і яго патэнцыял як найбуйнейшага інфармацыйнага і сацыякультурнага цэнтра.
Члены дэлегацыі наведалі Круглую залу, аглядную пляцоўку і музей кнігі. Асабліва гасцей уразілі рарытэты з калекцыі рукапісаў, старадрукаў і рэдкіх кніг, а таксама арыгінальныя выданні Францыска Скарыны, якія з’яўляюцца найкаштоўнейшай спадчынай кніжнай культуры Беларусі.
Таксама госці пазнаёміліся з выстаўкай мастацкіх галаграм “Асвета. Пазнанне. Прагрэс”, якая адлюстроўвае лепшыя дасягненні беларускіх вучоных у галіне галаграфіі. Сярод экспанатаў – галаграмы музейных каштоўнасцей, хрысціянскіх рэліквій, атрыбутыка Вялікай Айчыннай вайны, а таксама скарбы з фондаў Нацыянальнай бібліятэкі Беларусі – “Біблія” Францыска Скарыны (Прага, 1517–1519), “Евангелле” Пятра Мсціслаўца (Вільня, 1575), “Новы запавет і Псалтыр” (Куцеін, 1652).
Напрыканцы сустрэчы гасцям быў перададзены памятны падарунак.