27 лютага бібліятэку наведаў Дзяржаўны сакратар Міністэрства культуры і інфармацыі Рэспублікі Сербія Аляксандр Гаёвіч.
Візіт адбыўся ў рамках удзелу сербскай дэлегацыі на чале з Дзяржаўным сакратаром Міністэрства культуры і інфармацыі Рэспублікі Сербія Аляксандрам Гаёвічам у мерапрыемствах XXV Мінскай міжнароднай кніжнай выстаўкі-кірмашу. У гэтым годзе Сербія – ганаровы госць юбілейнага кніжнага форуму.
Дырэктар Нацыянальнай бібліятэкі Беларусі Раман Матульскі правёў для госця аглядную экскурсію, падчас якой пазнаёміў яго з гісторыяй установы, архітэктурай і інфармацыйнымі рэсурсамі галоўнага кнігасховішча краіны.
Ключавымі пунктамі экскурсійнага маршруту сталі Круглая зала, аглядная пляцоўка, музей кнігі і выстаўка мастацкай галаграфіі “Асвета. Пазнанне. Прагрэс”. Экспазіцыя не толькі адлюстроўвае дасягненні беларускіх вучоных у галіне галаграфіі, але і знаёміць з гісторыяй і культурай Беларусі. Сярод прадстаўленых галаграфічных экспанатаў – музейныя каштоўнасці, атрыбутыка Вялікай Айчыннай вайны, хрысціянскія рэліквіі, а таксама скарбы з фондаў Нацыянальнай бібліятэкі – “Біблія” Францыска Скарыны (Прага, 1517–1519 гг.), “Евангелле” Пятра Мсціслаўца (Вільня, 1575 г.), “Новы Запавет і Псалтыр” (Куцеін, 1652 г.).
На заканчэнне сустрэчы Раман Матульскі ўручыў Аляксандру Гаёвічу памятны падарунак.