20–27 жніўня ў Бялградзе праходзіць XVI Міжнародны кангрэс славістаў – буйны навуковы форум, прысвечаны праблемам развіцця славянскіх моў, літаратур, культур у іх узаемадзеянні, які праводзіцца кожныя пяць гадоў з 1929 года.
Бялград у 2018 годзе стаў цэнтрам сусветных славістычных даследаванняў. Асноўная праца кангрэса сканцэнтравана ў наступных кірунках:
- мова;
- літаратура, культура, фальклор;
- пытанні славістыкі;
- сербская славістыка (спецыяльная тэма кангрэса).
Папярэдні форум славістаў прайшоў у 2013 годзе ў Мінску. Тады Бошка Сувайціч, якога абралі старшынёю Міжнароднага камітэта славістаў, адзначыў, што арганізацыя з'езда – вялікая адказнасць: "Гэта вельмі складаная праца, калі мець на ўвазе крызіс славістыкі – як акадэмічнай дысцыпліны, так і гуманітарнай навукі. Але мы гатовыя прыняць форум у Бялградзе". Ад імя сербскай дэлегацыі прафесар выказаў вялікую падзяку арганізатарам XV Міжнароднага кангрэса славістаў за выдатнае правядзенне форуму, падкрэсліўшы, што вопыт беларускіх калег дапаможа ў арганізацыі сустрэчы ў Бялградзе.
Удзел у кангрэсе прыняў намеснік дырэктара Нацыянальнай бібліятэкі Беларусі Аляксандр Суша. Падчас навуковых мерапрыемстваў чакаецца абмеркаванне супрацоўніцтва з замежнымі бібліятэкамі, навучальнымі і навуковымі ўстановамі ў кірунку славістыкі.