Ва ўмовах дэфіцыту фінансавання, недахопу плошчаў для размяшчэння фондаў, зніжэння экзэмплярнасці закупляемых дакументаў, пагаршэння якасці паперы і спажывецкіх характарыстык выдавецкай прадукцыі ўзрастае пагроза зніжэння колькаснага і якаснага складу бібліятэчных фондаў. Без актыўнай працы па забеспячэнні захаванасці бібліятэчных фондаў значная частка дакументаў можа быць незваротна страчана.
22 кастрычніка ў рамках VII Міжнароднага кангрэса “Бібліятэка як феномен культуры” прайшоў круглы стол “Забеспячэнне захаванасці нацыянальных дакументаў на папяровай аснове: асноўныя працэсы і іх кадравае забеспячэнне” (мадэратары: Бярозкіна Н.Ю., кандыдат гістарычных навук, дацэнт кафедры Інстытута павышэння кваліфікацыі і перападрыхтоўкі кадраў Беларускага дзяржаўнага ўніверсітэта культуры і мастацтваў, Пшыбытка В.В., начальнік цэнтра алічбоўкі і забеспячэння захаванасці бібліятэчных дакументаў Нацыянальнай бібліятэкі Беларусі). Абмяркоўваліся актуальныя на сённяшні дзень пытанні арганізацыі захаванасці папяровых дакументаў, пераводу іх у электронны выгляд, кадравага забеспячэння спецыялістамі-рэстаўратарамі.
Таксама былі разгледжаны прыярытэтныя напрамкі сумеснай дзейнасці бібліятэк, архіваў і ўстаноў адукацыі, звязаныя з павышэннем кваліфікацыі супрацоўнікаў бібліятэк у галіне захаванасці дакументаў на папяровай аснове, падрыхтоўкай мастакоў-рэстаўратараў, неабходнасцю маніторынгу стану рэстаўрацыі і кансервацыі дакументаў у публічных бібліятэках Рэспублікі Беларусь.
У круглым стале ўзялі ўдзел спецыялісты бібліятэк, вышэйшых навучальных устаноў, а таксама арганізацый, якія спецыялізуюцца на рэстаўрацыі папяровых дакументаў.
Карысныя спасылкі:
Матэрыял пададзены цэнтрам алічбоўкі і забеспячэння захаванасці бібліятэчных дакументаў.