Каля 60 тысяч наведвальнікаў чакаецца на сёлетняй Мінскай міжнароднай кніжнай выстаўцы-кірмашы.
Упершыню шэраг падзей выстаўкі-кірмашу будзе праходзіць не толькі ў выставачным комплексе. У кінатэатрах і на беларускім тэлебачанні будуць трансліравацца фільмы па матывах кніг, у тэатрах пройдуць спектаклі па кніжнай тэматыцы. Ад станцыі метро “Няміга” да выставачнага комплексу плануецца маршрут “паэтычнага аўтобуса”. Акрамя таго, будуць ладзіцца прэзентацыі, сустрэчы, майстар-класы, аўтограф-сесіі ў крамах “Белкнігі”, бібліятэках, вучэбных установах. У межах свята ў Верхнім горадзе пройдзе гастратыдзень, у меню якога ўвойдуць стравы, звязаныя з літаратурнымі сюжэтамі.
Ключавыя падзеі адбудуцца на цэнтральным стэндзе Міністэрства інфармацыі Рэспублікі Беларусь. Асноўны праект стэнда – “У пошуках страчанага” лаўрэта прэміі “За духоўнае адраджэнне” Уладзіміра Ліхадзедава, дзе можна будзе пабачыць друкарскі станок XVI стагоддзя, філакратычныя калекцыі, рэдкія кнігі, газеты, часопісы, пісьмовыя прылады і іншае. З’явіцца магчымасць разгледзець арыгінал кнігі Францыска Скарыны “Малая падарожная кніжка” 1522 года выдання.
Плануецца, што пяцідзённая праграма будзе насычана шматлікімі падзеямі. У дзень адкрыцця – прэзентацыя праекта Terra poetica з удзелам Міхаіла Швыдкога, які прадставіць аўтараў альманаха, па чыіх творах сучаснікі ставяць п’есы. Дадуць старт арт-праекту “Мірны танк”, прысвечанаму 75-годдзю вызвалення Беларусі. Кожны наведвальнік зможа ўзяць удзел у зборы танка з кніг, якія затым перададуць у дзіцячыя і медыцынскія ўстановы.
Другі дзень – дзень аўтараў, асноўнай падзеяй якога стане Міжнародны сімпозіум літаратараў “Пісьменнік і час”. Ужо пяты раз сюды прыедуць больш як 50 пісьменнікаў з 25 краін.
Трэці дзень прысвечаны беларускай тэматыцы. На шматлікіх дыскусійна-адукацыйных пляцоўках будуць разглядацца тэмы афармлення і прасоўвання кніжнай прадукцыі. Плануецца падвядзенне вынікаў рэспубліканскага конкурсу на лепшы кнігагандлёвы аб’ект “Белкнігі” “Мы робім па людску?!” і ўрачыстая цырымонія ўзнагароджвання пераможцаў 58-га Нацыянальнага конкурсу “Мастацтва кнігі”.
Чацвёрты дзень зацікавіць бацькоў і дзяцей, паколькі будзе акцэнтаваны на прэзентацыі дзіцячай літаратуры. Між шматлікіх падзей дня – падвядзенне вынікаў акцыі “Пішам кнігу разам. Якой мы хочам бачыць Беларусь праз 10 гадоў”, арганізаванай сумесна з Міністэрствам інфармацыі і Міністэрствам адукацыі Беларусі. У пяты дзень узнагародзяць прадстаўнікоў за лепшыя экспазіцыі.
– На сёлетняй выстаўцы мы чакаем шмат рэкордаў. Галоўны – па колькасці наведвальнікаў, – распавёў старшыня Савета арганізатараў кніжных выставак і кірмашоў, якія ладзяцца ў краінах – удзельніцах СНД, генеральны дырэктар ВКТАА “Макбел” Дзмітрый Макараў.
Як і заўсёды, уваход бясплатны, што ў наш час немалаважна: выстаўка ў гэтым сэнсе адна з нямногіх у свеце. Чакаюцца і шматлікія навінкі, якія можна будзе набыць па мінімальным кошце.
Аўтар публікацыі: Яўгенія Шыцька.
Крыніца: Літаратура і мастацтва