Міністэрства інфармацыі і “Белкніга” выпусцілі праграму “Чытанка” з некалькімі дзясяткамі аўдыякніг для Android-дэвайсаў.
У ёй можна паслухаць творы класікаў беларускай літаратуры Якуба Коласа, Янкі Купалы, Максіма Багдановіча, Кузьмы Чорнага, Змітрака Бядулі, Міхася Зарэцкага, Максіма Гарэцкага і іншых, пераклады Адама Міцкевіча і Міколы Гусоўскага.
Ёсць тут і творы сучасных аўтараў, у тым ліку на рускай мове.
У 2019 годзе Міністэрства інфармацыі выклала ў агульны доступ больш за сто аўдыякніг. Але чамусьці не ўсе яны трапілі ў “Чытанку”.
Тады ж Аляксеем Чарнякевічам быў створаны “партызанскі навігатар” па больш як 170 беларускіх аўдыякнігах.
Сёлета ўрачыстасці, прысвечаныя Дню беларускага пісьменства, праходзяць у Капылі. Там адкрыюць памятны знак Цішку Гартнаму і ўручаць Нацыянальную літаратурную прэмію.
Крыніца: Budzma.by
