У Дзень горада, калі Мінск адзначаў 952 гадавіну першага ўпамінання ў летапісе, у будынку гарадской ратушы адбылася прэзентацыя кнігі вядомага мінскага архітэктара Сяргея Багласава “Адраджэнне гістарычнага цэнтра Мінска. 1980–2016”.
Кніга, якая выйшла ў выдавецтве Змітра Коласа, знаёміць з гісторыяй парушанага ў сярэдзіне ХХ стагоддзя гістарычнага цэнтра Мінска. Яе напісаў чалавек, які непасрэдна ўдзельнічаў у доўгім і складаным працэсе стварэння праектаў па рэканструкцыі цэнтра сталіцы. Па сутнасці гэта навукова-рэстаўрацыйная справаздача навуковага кіраўніка аб’екта ў выглядзе дакументальнай хронікі.
На сустрэчы з грамадскасцю яе аўтар Сяргей Георгіевіч Багласаў, лаўрэат спецыяльнай прэміі Прэзідэнта Рэспублікі Беларусь дзеячам культуры і мастацтва 2015 года, распавёў пра доўгі шлях аднаўлення старажытнай забудовы на вуліцах Рэвалюцыйнай, Інтэрнацыянальнай, Ракаўскай, Віцебскай, Зыбіцкай, плошчы Свабоды, пра аднаўленне ратушы, і прадэманстраваў відэапрэзентацыю розных аўтарскіх аб’ектаў.
Сяргей Багласаў нарадзіўся ў Магілёве ў 1949 годзе, але з 1962 года жыве ў Мінску. Пасля заканчэння Беларускага дзяржаўнага політэхнічнага інстытута па спецыяльнасці “архітэктура” ён працаваў у сектары звода помнікаў гісторыі і архітэктуры Інстытута мастацтвазнаўства, этнаграфіі і фальклора Акадэміі навук БССР. Даводзілася шмат вандраваць па краіне, вывучаць старажытнае дойлідства. З 1976 года, працуючы ў “Белрэстаўрацыі”, Сяргей Георгіевіч займаўся рэканструкцыяй Траецкага прадмесця і іншых помнікаў архітэктуры, а з 1980-га – гістарычным цэнтрам Мінска.
Сяргей Георгіевіч падзяліўся ўспамінамі пра тое, у якім занядбаным і напаўразбураным стане знаходзіліся будынкі ў канцы 70-х гадоў мінулага стагоддзя. У 80-я гады беларуская інтэлігенцыя рашуча выступіла ў абарону сваёй гістарычнай спадчыны. Будынкі былі ўзяты пад ахову дзяржавы, распрацавана 1-я канцэпцыя, вызначаны тэмпы рэканструкцыі, да працы далучыліся інстытуты “Мінскпраект” і “Белжылпраект”.
“Верхняга горада ў Мінску магло і не быць, – успамінае архітэктар, –Абмяркоўваліся варыянты зносу забудовы. Даведаўшыся пра гэта, мы з Алегам Трусавым напісалі ліст Аляксею Касыгіну (ён быў старшынёй Усесаюзнага таварыства па ахове помнікаў гісторыі і культуры). Ліст патрапіў карэспандэнту “Правды” ў Беларусі Івану Новікаву, які выступіў з артыкулам. Гісторыя атрымала галоснасць, і необходнасць у зносе будынкаў адпала. За рэканструкцыю Верхняга горада выступілі ў друку з артыкуламі Уладзімір Караткевіч і Адам Мальдзіс.
Ідэя аднаўлення ратушы ўзнікла яшчэ ў 1980 годзе, але толькі ў 2002-м пачаліся будаўнічыя працы, якія завяршыліся ў 2003-м.
У творчай майстэрні Сяргея Багласава былі распрацаваны праекты аднаўлення былой царквы Святога Духа, будаўніцтва гандлёвага комплекса з паркінгам на вуліцы Няміга, гатэляў “Еўропа” і “Манастырскі”, шматлікіх скульптурных кампазіцый.
Госці сустрэчы атрымалі кнігі з аўтаграфам знанага архітэктара і выказалі яму шчырую падзяку.
Эла Дзвінская, фота аўтара.
Матэрыял падрыхтаваны аддзелам суправаджэння інтэрнэт-партала.