У час рэканструкцыі Косаўскага палаца знойдзены гістарычныя артэфакты – скрыня з кнігай і манетамі, паведаміў карэспандэнту БелТА галоўны спецыяліст упраўлення культуры Брэсцкага аблвыканкама Арцём Брухан.
Невялікі куфэрак пецярбургскай фірмы знойдзены будаўнікамі ў час пракладкі камунікацый. Увесь працэс праходзіў пад наглядам археолага. Знаходку ўдалося адкрыць. Унутры ляжала кніга і некалькі манет пачатку ХХ стагоддзя.
"Кніга ў дрэнным стане. Яе паклалі ў спецыяльны маразільнік, каб яна не развалілася. Чакаем прыезду прафесара з Нацыянальнай бібліятэкі, каб ён яе забраў і паспрабаваў адрэстаўрыраваць. Таксама ў куфары былі манеты 1906–1907 гадоў", – расказаў Арцём Брухан. Магчыма, знойдзеныя артэфакты папоўняць экспазіцыю палаца.
Рэканструкцыя Косаўскага палаца пачалася ў 2008 годзе. У лістападзе 2017-га там адкрылася часовая музейная экспазіцыя. Госці могуць наведаць 5 залаў. Прадстаўлены матэрыялы аб Косаве і навакольнай мясцовасці, родзе Пуслоўскіх, знойдзеныя ў час археалагічных раскопак экспанаты. Наведвальнікам таксама прапануюць даведацца аб асаблівасцях рэстаўрацыі аб'екта.
Фота музея-сядзібы Тадэвуша Касцюшкі, а таксама Вадзіма Якубёнка.
Крыніца: БелТА
Каментарый: Кансультацыйную дапамогу ў вызначэнні каштоўнасці знаходкі аказаў намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці, кандыдат культуралогіі, кнігазнавец Аляксандр Суша.
