Могуць сказаць, што ў гэтай кнізе я толькі
Склаў букет з чужых кветак, а мая тут
Толькі стужачка, якая звязвае іх.
Мішэль Мантэнь
Новую кнігу вядомага мінскага краязнаўца Уладзіміра Валажынскага “Минск в легендах, мифах и преданиях” прэзентуюць у Мастацкай галерэі Міхаіла Савіцкага 27 лютага.
Каля сямі гадоў карпатлівай, але захапляльнай працы пайшло ў аўтара на падрыхтоўку зборніка міфаў, легенд і паданняў пра Мінск і яго ваколіцы. Цягай да пазнання невядомага, малавывучанага, цікаўнасцю, жаданнем дакрануцца да таямніц гісторыі, дакапацца да ісціны, схаванай у скупых словах летапісаў і нешматлікіх дайшоўшых да нас дакументах, прадыктавана цікавасць аўтара да вывучэння гарадскога фальклору.
Кніга складаецца з чатырох раздзелаў. У першым прыведзены легенды, міфы, паданні, што адносяцца да перыяду ад узнікнення горада і да пачатку ХХ стагоддзя, у другім – легенды, што з’явіліся ў савецкі перыяд жыцця краіны. Трэці раздзел – тапанімічны. У чацвёртым – знайшоў адлюстраванне сучасны гарадскі фальклор, звязаны з тапанімікай, – тое, што нараджаецца на нашых вачах, абрастае падрабязнасцямі, удакладненнямі і ў такім абноўленым выглядзе, ужо ў якасці новых легенд, перадаецца нашчадкам.
Так ці інакш, гарадскія легенды з’яўляюцца нашай культурнай спадчынай, надаюць гораду свой непаўторны, унікальны каларыт, ажыўляюць яго мінулае, прымушаюць па-новаму зірнуць на яго гісторыю.
У праграме прэзентацыі:
- творчая сустрэча з аўтарам
- містычная аўтограф-сесія
- казачны розыгрыш першай кнігі
Прэзентацыя адбудзецца ў атмасферы таямнічасці і абяцае быць легендарнай.
Уваход вольны!
Крыніца: Музей гісторыі горада Мінска
