Нарадзілася Ала Васільеўна ў 1946 г. у Мінску. Адразу пасля заканчэння сталічнай школы дзяўчына працавала лабарантам у інстытуце агульнай і неарганічнай хіміі Акадэміі навук БССР. На наступны год паступіла ў Мінскі педагагічны інстытут імя М. Горкага (цяпер – Беларускі дзяржаўны педагагічны ўніверсітэт імя Максіма Танка) на бібліятэчны факультэт, які з адзнакай скончыла ў 1969 г.
Па накіраванні Міністэрства культуры БССР дзяўчына была прынята на пасаду бібліёграфа ў навукова-бібліяграфічны аддзел Дзяржаўнай бібліятэкі БССР імя У.І. Леніна (цяпер – Нацыянальная бібліятэка Беларусі) і з першых гадоў працы праявіла сябе як цудоўны прафесіянал, эрудзіраваны, сур’ёзны і ўдумлівы супрацоўнік, здольны выконваць складаную рэдактарскую працу.
Праз чатыры гады Алу Васільеўну перавялі на пасаду старшага бібліятэкара. Яна займалася складаннем рэкамендацыйных паказчыкаў літаратуры, была рэдактарам бюлетэня “Новыя кнігі БССР”.
У 1977 г. А.В. Мураўёва была пераведзена на пасаду старшага рэдактара. Праз год стала загадчыцай сектара бюлетэня “Новыя кнігі БССР” у аддзеле рэкамендацыйнай бібліяграфіі. Яе дасведчанае кіраўніцтва і высокі прафесіяналізм забяспечвалі своечасовую і якасную падрыхтоўку выдання.
У 1979 г. Але Васільеўне Мураўёвай было прысвоена званне “Лепшы па прафесіі”.
Шматгадовая плённая праца, высокае пачуццё адказнасці за даручаную справу дазволілі Але Васільеўне ў 1987 г. узначаліць аддзел рэкамендацыйнай бібліяграфіі.
Неўзабаве на базе дадзенага аддзела і сектара зводнага каталога аддзела беларускай літаратуры і бібліяграфіі быў створаны навукова-бібліяграфічны аддзел, першым кіраўніком якога стала А.В. Мураўёва. На гэтай пасадзе яна адпрацавала 17 гадоў. Ала Васільеўна распрацоўвала шляхі ўдасканалення інфармацыйна-бібліяграфічнай дзейнасці бібліятэкі, ажыццяўляла пошук новых стратэгій развіцця, разглядала магчымыя варыянты аптымізацыі створаных бібліятэкай баз даных.
Намеснік дырэктара па навуковай рабоце Л.Г. Кірухіна ў 1997 г. у атэстацыйнай характарыстыцы адзначала: “…Выдатнае спалучэнне тэарэтычных ведаў з практычнай дзейнасцю вылучае Алу Васільеўну Мураўёву не толькі сярод калег-супрацоўнікаў бібліятэкі, але і сярод бібліёграфаў рэспублікі. Яна высокакваліфікаваны спецыяліст, таленавіты бібліёграф. Ёй уласцівы маштабны погляд на праблемы бібліяграфазнаўства, на пошукі нетрадыцыйных шляхоў іх вырашэння. Ёй належыць ініцыятыва па арганізацыі навуковых даследаванняў, накіраваных на вывучэнне бібліяграфічнага забеспячэння беларусазнаўства, краязнаўства. Працуючы загадчыкам аддзела, шмат увагі надае каардынацыі бібліяграфічнай дзейнасці і аказанню метадычнай дапамогі абласным бібліятэкам у авалоданні новымі інфармацыйнымі тэхналогіямі…”.
А.В. Мураўёва стала адным з галоўных распрацоўшчыкаў Нацыянальнага машыначытальнага абменнага фармату BELMARC. Яна займалася пытаннямі стварэння электроннага каталога Нацыянальнай бібліятэкі Беларусі (НББ).
Значны ўклад Алы Васільеўны ў навукова-метадычнае забеспячэнне работы па стварэнні Нацыянальнай базы даных аўтарытэтных запісаў. Яна праводзіла навучанне і аказвала кансультацыйную дапамогу работнікам аддзела, які займаецца стварэннем і вядзеннем гэтага рэсурсу.
У 2004 г. А.В. Мураўёва была пераведзена на пасаду галоўнага бібліёграфа ў аддзел бібліятэчных тэхналогій, дзе і прапрацавала да самага выхаду на пенсію.
За плённую высокапрафесійную працу, значны асабісты ўклад у развіццё бібліятэчна-інфармацыйных тэхналогій Рэспублікі Беларусь А.В. Мураўёва ўзнагароджана медалём Францыска Скарыны (1997 г.) і Ганаровай граматай Дзяржаўнага камітэта па навуцы і тэхналогіях Рэспублікі Беларусь (2012 г.).
На працягу ўсяго працоўнага шляху Ала Васільеўна спалучала сваю прафесійную дзейнасць з актыўнай грамадскай пазіцыяй, прымаючы неабыякавы ўдзел у жыцці аддзела і бібліятэкі: неаднаразова абіралася ў склад прафсаюзнага камітэта бібліятэкі, была прафаргам аддзела і палітінфарматарам. Шмат гадоў з’яўлялася старшынёй бібліяграфічнага камітэта савета Беларускай бібліятэчнай асацыяцыі.
30 снежня 2015 г. Ала Васільеўна пайшла на заслужаны адпачынак, прысвяціўшы Нацыянальнай бібліятэцы Беларусі 46 гадоў свайго прафесійнага жыцця.
Ад усёй душы віншуем Алу Васільеўну з юбілейнай датай і жадаем моцнага здароўя, доўгіх і шчаслівых гадоў жыцця, дабрабыту і аптымізму!
Матэрыял падрыхтаваны навукова-даследчым аддзелам бібліятэказнаўства.
У публікацыі выкарыстаны фота з асабістага архіва С. Базылевай-Ланько.
Аб ветэранах і супрацоўніках Нацыянальнай бібліятэкі Беларусі чытайце ў рубрыцы навін “Партрэты: гісторыя бібліятэкі ў асобах”.
