Зінаіда Канстанцінаўна нарадзілася 31 жніўня 1931 года ў сяле Цюменцава Алтайскага краю. Скончыўшы сярэднюю школу, у 1949 годзе яна паступіла на гадавыя курсы пры Новасібірскай абласной бібліятэцы. Пасля завяршэння вучобы Зінаіда была накіравана на пасаду загадчыцы абанемента ў Іскіцімскую раённую бібліятэку Новасібірскай вобласці, дзе прапрацавала наступныя 14 гадоў.
Працу дзяўчына сумяшчала з вучобай: у 1951 годзе скончыла завочнае аддзяленне Томскага бібліятэчнага тэхнікума і падоўжыла спецыяльную адукацыю ў Маскоўскім дзяржаўным бібліятэчным інстытуце (цяпер – Маскоўскі дзяржаўны інстытут культуры).
У лістападзе 1964 года па выкліку ўпраўлення культуры Зінаіда Канстанцінаўна пераехала ў г. Паўднёва-Сахалінск, дзе была залічана ў штат абласной бібліятэкі на пасаду старшага бібліятэкара. Тут яна выйшла замуж і, калі праз год мужа перавялі на новае месца службы ў г. Бабруйск Магілёўскай вобласці, звольнілася.
У Бабруйску са студзеня па жнівень 1966 года яе прафесійная дзейнасць працягнулася першапачаткова ў якасці загадчыцы бібліятэкай в/ч 22103 г. Кісялевічы Бабруйскага раёна, пазней – бібліятэкара Бабруйскай гарадской бібліятэкі імя М.В. Гогаля.
У хуткім часе лёс прывёў З.К. Слепчанка ў Мінск, у Дзяржаўную бібліятэку БССР імя У.І. Леніна (цяпер – Нацыянальная бібліятэка Беларусі), куды яна была прынята ў жніўні 1966 года на пасаду бібліятэкара ў аддзел апрацоўкі і каталогаў.
Маючы на той момант 15-гадовы бібліятэчны стаж, Зінаіда Канстанцінаўна цудоўна спраўлялася з ускладзенымі на яе абавязкамі па апрацоўцы дапаможнага фонду і праз паўтара года была пераведзена на пасаду старшага бібліятэкара.
Зінаіда Канстанцінаўна другая злева ў верхнім шэрагу
У 1975 годзе З.К. Слепчанка была прызначана кіраўніком групы алфавітных каталогаў, а з 1 кастрычніка 1979 года ўзначаліла сектар арганізацыі і вядзення алфавітных каталогаў.
Зінаіда Канстанцінаўна аказвала кансультатыўную дапамогу бібліятэчным спецыялістам па пытаннях вядзення каталога, чытала лекцыі аб правілах каталагізацыі ў інстытуце павышэння кваліфікацыі (цяпер – Інстытут павышэння кваліфікацыі і перападрыхтоўкі кадраў УА “Беларускі дзяржаўны ўніверсітэт культуры і мастацтваў”). З.К. Слепчанка з’яўляецца складальнікам метадычных рэкамендацый “Библиографическое описание документа”, “Как выбрать книгу” і “Организация алфавитного каталога в массовых библиотеках”.
Зінаіда Канстанцінаўна ў верхнім шэрагу ў цэнтры
Зінаіда Канстанцінаўна прымала актыўны ўдзел у грамадскім жыцці бібліятэкі, на працягу многіх гадоў была членам рэдкалегіі насценгазеты.
Яе прафесіяналізм не раз адзначаўся падзякамі ад кіраўніцтва бібліятэкі, у 1978 годзе – Ганаровай граматай Міністэрства культуры БССР і БРК работнікаў культуры.
З.К. Слепчанка сышла на заслужаны адпачынак у жніўні 1991 года, прысвяціўшы бібліятэцы 25 гадоў свайго прафесійнага жыцця.
На жаль, з цягам часу кантакты з Зінаідай Канстанцінаўнай былі згубленыя. На сённяшні дзень вядома, што яна пайшла з жыцця. Аднак, мы не ведаем, калі гэта адбылося. Будзем удзячныя ўсім, хто валодае якой-небудзь інфармацыяй і дапаможа дапоўніць матэрыял.
Матэрыял падрыхтаваны навукова-даследчым аддзелам бібліятэказнаўства.
Аб ветэранах і супрацоўніках Нацыянальнай бібліятэкі Беларусі чытайце ў рубрыцы навін “Партрэты: гісторыя бібліятэкі ў асобах”.