Наш калектыў панёс вялікую страту: 15 мая перастала біцца сэрца Святланы Анатольеўны Базылевай-Ланько (27.10.1965 – 15.05.2021).
Увесь працоўны шлях Святланы прайшоў у сценах галоўнай бібліятэкі краіны. Пачаўся ён у 1988 годзе, пасля заканчэння Мінскага інстытута культуры, калі дзяўчына стала бібліятэкарам Дзяржаўнай бібліятэкі БССР імя У.І. Леніна, неўзабаве была прызначана на пасаду загадчыцы сектара аддзела бібліятэчнага абслугоўвання.
Мы памятаем яе за кафедрай агульнай чытальнай залы – уважлівую, добразычлівую, з пастаяннай усмешкай. У выніку, праявіўшы сябе як добры і высокакваліфікаваны спецыяліст, яна ўзначаліла сектар арганізацыі цэнтральнага падсобнага фонду. Таксама працавала ў аддзеле бібліятэчна-інфармацыйных тэхналогій, а ў 2019 годзе стала галоўным бібліёграфам інфармацыйна-аналітычнага аддзела.
Апошнім часам Святлана Анатольеўна актыўна займалася падрыхтоўкай праекта “Нацыянальная бібліятэка Беларусі ў сучаснай прэсе” (праект прысвечаны 100-годдзю НББ), удзельнічала ў даследчыцкай працы ў якасці пазаштатнага фатографа.
Святлану заўсёды можна было сустрэць з фотаапаратам у руках на святочных мерапрыемствах, канцэртах, канферэнцыях бібліятэкі: яна імкнулася захаваць усе памятныя моманты, збірала фотаархіў.
Акрамя гэтага, на працягу доўгага часу Святлана Анатольеўна актыўна ўдзельнічала ў працы прафсаюзнага камітэта НББ.
Ініцыятыўнасць, адказнасць, добрасумленнасць, камунікабельнасць, дабрыня і нераўнадушнасць – менавіта гэтыя якасці вабілі да яе мноства сяброў і аднадумцаў. Шчырая зацікаўленасць жыццём калектыву абумовіла ўсеагульную любоў і павагу да яе.
Непапраўная страта для нас. Любім, памятаем, смуткуем.