75-годдзю Перамогі ў Вялікай Айчыннай вайне прысвячаецца новы праект Нацыянальнай бібліятэкі Беларусі – “100 дзён да Вялікай Перамогі. Па старонках беларускіх газет 1945 г.”. З 30 студзеня па 9 мая 2020 г. штодня на партале бібліятэкі публікуюцца матэрыялы, якія адлюстроўваюць хроніку навін і падзей з публікацый адпаведнага перыяду ў газетах Савецкай Беларусі 1945 г.
Уражанне пра наступленне савецкіх войскаў. Фільм “Вызваленне Савецкай Беларусі”. Газета “Звязда” (№ 35).
Савецкія людзі ўжо прывыклі атрымліваць добрыя навіны пра перамогі сваёй арміі і паражэнні суперніка. Але даставалася гэта дарагой цаной, і ўсе гэта разумелі. На Земландскім (Калінінградскім) паўвостраве нямецкія часці паспрабавалі прарвацца з акружанага Кенігсберга на захад – напружаны бой доўжыўся цэлы дзень, але іх спроба не ўдалася.
Наступленне савецкіх войскаў працягвалася ля Данцыга, у правінцыі Брандэнбург. Адзін з палонных нямецкіх афіцэраў даў такую ацэнку прасоўванню нашага войска: “…наступление превосходит все самые крупные военные операции, которые когда-либо предпринимались. Ничего подобного никто из нас не видел. Мы считали свою мощную и глубоко эшелонированную оборону неприступной и неуязвимой. <…> За два дня наша дивизия была разгромлена”; камандзіры гэтай дывізіі начамі, спрабуючы знайсці сваіх, “прошли десятки километров”, на 8-ы дзень трапілі ў палон і толькі тут даведаліся, што апынуліся ў глыбокім тыле.
Уражаннямі аб зруйнавальным наступленні Чырвонай арміі і ўзяцці гарадоў дзеляцца карэспандэнты амерыканскіх газет – іх агляд можна прачытаць на 2-й старонцы газеты “Звязда” (№ 35). Ніжэй аўтар іншага артыкула піша, што дарогамі Германіі на Польшчу і далей у СССР ідуць пешшу і едуць на фурах савецкія грамадзяне – рускія, украінцы, беларусы, (жанчыны, старыя, дзеці), якіх немцы прымусова вывезлі для працы на заводах, фабрыках, фермах.
А ў Мінску, у кінатэатры “Першы”, пры перапоўненай зале адбыўся паказ дакументальнага фільма “Вызваленне Савецкай Беларусі”. Перад пісьменнікамі, кампазітарамі, артыстамі, інжынерамі, лекарамі, перад сеансам, з расповедам пра фільм выступілі рэжысёр М. Садковіч і кампазітар Я. Цікоцкі.
78 дзён засталося да Перамогі...
Аўтар публікацыі: Л. Тупчыенка-Кадырава, аддзел карпаратыўнага ўзаемадзеяння НББ.
Усе матэрыялы праекта даступны на партале НББ і сайце “Беларусь у інфармацыйнай прасторы”.
