75-годдзю Перамогі ў Вялікай Айчыннай вайне прысвячаецца новы праект Нацыянальнай бібліятэкі Беларусі – “100 дзён да Вялікай Перамогі. Па старонках беларускіх газет 1945 г.”.
З 30 студзеня па 9 мая 2020 г. штодня на партале бібліятэкі публікуюцца матэрыялы, якія адлюстроўваюць хроніку навін і падзей з публікацый адпаведнага перыяду ў газетах Савецкай Беларусі 1945 г.
Аб святкаванні дня Чырвонай арміі. Хата-чытальня на Віцебшчыне. Навіны саюзнікаў. Газета "Звязда" (№ 37).
Матэрыялы гэтага дня ў газеце звязаныя са святкаваннем Дня Чырвонай арміі і Ваенна-марскога флоту і апісаннем мерапрыемстваў, якія прайшлі 23 лютага.
Гэта быў звычайны працоўны дзень.
Але гэта быў незвычайны працоўны дзень.
Святочны.
Удзень ва ўстановах і на прадпрыемствах адбываліся мітынгі.
Сярод адзначаных дасягненняў – перавыкананне плана. Сярод мерапрыемстваў, прымеркаваных да ўрачыстасці, – лісты на фронт (працоўныя Бабруйска накіравалі ў войска салдатам і афіцэрам 10 000 лістоў з віншаваннямі), пасылкі (з Іванаўскага раёна на Брэстчыне адправілі на фронт сушаную садавіну і іншыя прадукты, з Ваўкавыска на Гарадзеншчыне – шалікі і рукавіцы).
На пасяджэннях у абласных і раённых саветах, у калгасах і саўгасах гучалі прамовы і апладысменты.
А ўвечары, нягледзячы на калючы мароз, мінчане выйшлі на вуліцы і плошчы, каб убачыць і пачуць святочны салют.
На 2-й старонцы газеты – вялікі нарыс пра дзейнасць хаты-чытальні Свечанскага сельскага савета ў Віцебскай вобласці.
Саюзнікі напярэдадні гэтага дня занялі Віяндэн, тым самым Люксембург быў ачышчаны ад нямецкіх войскаў. Амерыканскія часткі 5-й арміі "працягвалі паляпшаць свае пазіцыі" на захадзе ад шашы Балоння-Пістоя, бразільскія часткі гэтай арміі занялі адно з узвышшаў. Англійскія бамбавікі працягвалі бамбаваць ваенныя аб'екты ў Цэнтральнай і Паўднёвай Германіі, у Аўстрыі і Паўночнай Італіі; упершыню з пачатку вайны была падвергнута бамбардзіроўцы вясковая рэзідэнцыя Гітлера – Берхтэсгадэн. Італьянскія партызаны перахапілі сакрэтнае паведамленне, адрасаванае Мусаліні яго "паслам" у Берліне, у ім паведамлялася: "становішча ў Берліне надзвычай трагічнае, але немцы так знясіленыя фізічна і маральна, што выключана магчымасць паўстання...".
Працягваюцца баі ў Югаславіі, Малайзіі, на Ціхім акіяне.
Да Перамогі застаецца 75 дзён...
Аўтар публікацыі: Л. Тупчыенка-Кадырава, аддзел карпаратыўнага ўзаемадзеяння.
Усе матэрыялы праекта даступны на партале НББ і сайце “Беларусь у інфармацыйнай прасторы”.
