З 23 кастрычніка да ўвагі карыстальнікаў прадстаўлена пастаянная віртуальная выстаўка “Пры моцнай ААН свет становіцца лепшым”, прысвечаная 70-годдзю Арганізацыі Аб'яднаных Нацый.
24 кастрычніка 2015 года сусветная грамадскасць адзначыць 70-годдзе стварэння Арганізацыі Аб’яднаных Нацый.
Юбілей – добрая нагода падвесці вынік дзейнасці арганізацыі за некалькі дзесяцігоддзяў і вызначыць перспектыўныя кірункі далейшага развіцця ў сувязі са з’яўленнем новых пагроз і выклікаў.
Азнаёміўшыся з матэрыяламі, прадстаўленымі на віртуальнай выстаўцы “Пры моцнай ААН свет становіцца лепшым”, карыстальнікі і госці бібліятэкі атрымаюць магчымасць даведацца як мага больш пра адну з вядучых міжнародных арганізацый і пра яе ролю ў жыцці сусветнай супольнасці. Яны пазнаёмяцца з афіцыйнымі дакументамі і публікацыямі сістэмы ААН пачынаючы з падрыхтоўчага перыяду стварэння арганізацыі падчас Другой сусветнай вайны, яе станаўлення ў пасляваенны перыяд і да цяперашняга часу.
Нацыянальная бібліятэка Беларусі стала часткай сусветнай сеткі дэпазітарных бібліятэк ААН са снежня 1957 года. У бібліятэцы сабрана ўнікальная калекцыя дакументаў ААН. Тэматыка гэтых дакументаў універсальная, яна ахоплівае ўсе бакі жыцця грамадства і сферы дзейнасці чалавека. Унікальнасць фонду ААН Нацыянальнай бібліятэкі Беларусі ў тым, што, акрамя афіцыйных дакументаў кіруючых органаў ААН, бібліятэка атрымлівае дакументы і публікацыі спецыялізаваных устаноў і іншых самастойных арганізацый, якія ўваходзяць у сістэму Арганізацыі Аб’яднаных Нацый.
У дакументах, што экспануюцца на віртуальных стэндах, раскрываецца шматгранная дзейнасць ААН па збавенні будучых пакаленняў ад бедстваў вайны, падтрыманні міру і міжнароднай бяспекі, развіцці дружалюбных адносін паміж нацыямі, вырашэнні міжнародных праблем эканамічнага, сацыяльнага, культурнага і гуманітарнага характару.
На віртуальнай выстаўцы прадстаўлена больш за 260 дакументаў з фондаў Нацыянальнай бібліятэкі Беларусі на рускай і англійскай мовах: кнігі, перыядычныя выданні, мімеаграфаваныя матэрыялы ААН, брашуры, буклеты. Экспазіцыя складаецца з сямі тэматычных раздзелаў. Для кожнага раздзела віртуальнай выстаўкі складзены бібліяграфічны спіс літаратуры.
Простая навігацыя з гіперспасылкамі для зручнасці перамяшчэння ў патрэбны карыстальніку раздзел, кароткая даведачная інфармацыя да кожнага раздзела і адпаведны дызайн палягчаюць успрыманне матэрыялу, прадстаўленага на віртуальнай выстаўцы.
Пры наведванні бібліятэкі выданні, якія экспануюцца, можна атрымаць у зале дакументаў міжнародных арганізацый (пам. 207g). Кансультацыю па пошуку і заказе дакументаў акажуць супрацоўнікі залы. Віртуальныя наведвальнікі могуць заказаць неабходныя для работы выданні з дапамогай электроннага каталога на інтэрнэт-партале бібліятэкі.
Віртуальная выстаўка падрыхтавана супрацоўнікамі сектара абслугоўвання дакументамі міжнародных арганізацый аддзела абслугоўвання афіцыйнымі дакументамі.
Тэлефон для даведак: (8 017) 293 27 34.
Чытайце таксама пра іншыя віртуальныя выстаўкі бібліятэкі:
