8 верасня адбылося адкрыццё выставачнага праекта “БібліяКОМПАС. Навігатар па падарунках бібліятэцы”.
На працягу свайго 100-гадовага існавання Нацыянальная бібліятэка Беларусі з’яўляецца не толькі галоўнай кніжнай скарбніцай краіны, але і цэнтрам доступу да інфармацыі са шматлікіх крыніц і носьбітаў. Па выніках культурных і адукацыйных акцый фонды бібліятэкі папаўняюцца нацыянальнымі сувенірамі розных краін. У межах святкавання 100-гадовага юбілею ўвазе наведвальнікаў прадстаўлены шматлікія і разнастайныя падарункі партнёраў, гасцей, сяброў і чытачоў бібліятэкі.
Выказаць падзяку за сумесную працу і развіццё бібліятэчнай справы, павіншаваць Нацыянальную бібліятэку Беларусі з юбілеем сабраліся калегі, сябры, прадстаўнікі міністэрстваў і ведамстваў. З прывітальным зваротам на адкрыцці выступіла генеральны дырэктар Нацыянальнай бібліятэкі Беларусі Аксана Кніжнікава. З цёплымі словамі звярнуліся да прысутных старшыня Саюза пісьменнікаў Беларусі Аляксандр Карлюкевіч, галоўны рэдактар часопіса “Роднае слова” Наталля Шапран.
На выстаўцы можна ўбачыць жывапісныя палотны, калажныя работы, акварэльныя замалёўкі і фотапластыку, нацыянальныя прадметы адзення, альбомныя выданні ад прыватных асоб і замежных дэлегацый з краін Еўропы, Азіі і Афрыкі і, канешне, кнігі – з аўтографамі пісьменнікаў, даследчыкаў, вучоных і мастакоў, факсіміле кніжных помнікаў, сучасныя рэдкія выданні, падараваныя бібліятэцы прыватнымі асобамі і арганізацыямі. Сярод іх вылучаюцца: кніга мастака Ю. Якавенкі “Cantico dei cantici” (“Песня песняў”), узноўленая па старажытнай тэхналогіі “Карта свету Джавані Вавасорэ”, 18-томнае факсімільнае выданне знакамітай “Iconotheca Valvasoriana” – калекцыі графічных твораў нямецкіх, аўстрыйскіх, галандскіх, фламандскіх, французскіх, італьянскіх, англійскіх і крайнскіх майстроў ХVI–XVII стст.
Асобнае месца ў экспазіцыі займаюць узнагароды, атрыманыя бібліятэкай за паспяховую працу ў ажыццяўленні выдавецкіх праектаў па захаванні і папулярызацыі кніжнай спадчыны, за актыўную дзейнасць у сферы міжнароднага гуманітарнага супрацоўніцтва.
Многія экспанаты будуць дэманстравацца ўпершыню.
Выставачны праект працуе ў выставачным комплексе да 30 лістапада 2022 года.
Дата яго заканчэння можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Матэрыял пададзены аддзелам сувязей з грамадскасцю.
